បាត់ដំបង ៖ អាវុធហត្ថ ក្រុងបាត់ដំបង ឃាត់ខ្លួនបុរស ៤ នាក់ និងថ្នាំញៀន ម៉ាទឹកកក ៩៩៩ ក្រាម និងកាំភ្លើងខ្លី ១ ដើម ព្រមទាំងសំភារៈ មួយចំនួន ទៀត រួចកសាង សំណុំរឿង បញ្ជូនទៅ តុលាការ នារសៀល ថ្ងៃទី ២៩ ខែមករា ឆ្នាំ២០១៤ ចាត់ការ តាមនិតិវិធី ។
ហេតុការណ៍បង្ក្រាប ធ្វើឡើងកាលពីវេលាម៉ោង១៩ និង ៣០យប់ ថ្ងៃទី២៨ ខែមករាឆ្នាំ២០១៤ នៅចំណុចសួននាគបាញ់ទឹក ឋិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ។
លោក សំ វីឡុង មេបញ្ជាការរងអាវុធហត្ថ ក្រុងបាត់ដំបង បានអោយដឹងថា បុរសសង្ស័យ ដែលសមត្ថកិច្ចឃាត់ខ្លួន ៤ នាក់ ទី១ ឈ្មោះ ធី សុភ័ក្រ្ត អាយុ ២៩ ឆ្នាំ ជាយោធាកងពលលេខ ៦ រស់នៅផ្លូវលេខ ១៤៨ សង្កាត់ផ្សារ កណ្តាល២ ខណ្ឌដូនពេញ រាជធានីភ្នំពេញ ។ ទី២ ឈ្មោះ ថុង គឹមលាង អាយុ ២១ ឆ្នាំ ជាអ្នកកាន់ថ្នាំញៀន ស្នាក់បណ្តោះអាសន្ន ខណ្ឌទួលគោក រាជធានីភ្នំពេញ ។ ទី៣ ឈ្មោះ សុខ ហេង អាយុ ៥០ ឆ្នាំ ជាអ្នកទិញ រស់នៅភូមិ ឃុំស្វាយរលំ ស្រុកស្អាង ខេត្តកណ្តាល ។ ទី៤ ឈ្មោះ សារី ថាន់ អាយុ ៣៤ ឆ្នាំ ជាអ្នកទិញ រស់នៅ សង្កាត់ផ្សារដើមថ្កូវ ខណ្ឌមានជ័យ រាជធានីភ្នំពេញ ។
វត្ថុតាង ដែលរឹបអូសបាន មានថ្នាំញៀន ប្រភេទ ម៉ាទឹកកក ១ ថង់ធំ ស្មើទំងន់ ៩៩៩ ក្រាម ទាំងថង់រថយន្តម៉ាកប៉ាជីរ៉ូ ១ គ្រឿង កាំភ្លើងខ្លី ម៉ាកឡុក ១ ដើម គ្រាប់ ចំនួន ១២ គ្រាប់ កាតយោធា និងលិខិតបេសកកម្ម ១ សន្លឹក និង សម្ភារៈមួយចំនួន ទៀត ។
ឈ្មោះ ធី សុភ័ក្រ្ត ជនសង្ស័យ បានអោយដឹងថា ខ្លួនបានស៊ីឈ្នួល កាន់ថ្នាំញៀន ពីភ្នំពេញ មកបាត់ដំបង ដោយជួលរថយន្តគេ និងនាំប្អូន ឈ្មោះ ថុង គឹមលាង មកលេងបាត់ដំបង ។ ពេលមកដល់ ត្រូវ ឈ្មោះ សុខ ហេង និង ឈ្មោះ សារី ថាន់ ទូរស័ព្ទ ណាត់យកថ្នាំ ហើយពេលកំពង់ដោះដូរ ក៏ត្រូវសមត្ថកិច្ច ឡោមព័ទ្ធឃាត់ខ្លួន បានតែម្តង ។
លោក សំ វីឡូង មេបញ្ជាការរង បានបញ្ជាក់ថា ក្រោយពីធ្វើតេស ហើយសមត្ថកិច្ច រៀបចំបញ្ជូន ជនសង្ស័យទាំង ៤ នាក់ និង វត្ថុតាង កសាងសំណុំរឿង ពីបទជួញដូរ គ្រឿងញៀនខុសច្បាប់ បញ្ជូនទៅ តុលាការ នារសៀល ថ្ងៃទី២៩ ខែមករា ឆ្នាំ២០១៤ ចាត់ការ តាមនិតិវិធី ៕
