មណ្ឌលគិរី៖ ដោយមានកាយកចិត្តទុកដាក់ពីសុខទុក្ខរបស់កងកម្លាំងនគរបាលដែលឈរជេីងនៅតាមខ្សែបន្ទាត់ព្រំដែន ក្នុងការទប់ស្កាត់កាឆ្លងដែនដោយខុសច្បាប់របស់ប្រជាពលរដ្ឋដើម្បីបង្ការទប់ស្កាត់នៃការរីករាលដាលជម្ងឺកូវីដ-១៩ រវាងភាគីនៃប្រទេសទាំងពីរកម្ពុជា-វៀតណាម, នាព្រឹកថ្ងៃចន្ទ ១៥កើត ខែស្រាពណ៍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី ២៣ ខែសីហា ឆ្នាំ២០២១ នៅស្នងការដ្ឋាននគរបាលខេត្តមណ្ឌលគិរី បានរៀបចំពិធីទទួលអំណោយពីនាយកដ្ឋានកណ្តាលនគរបាលការពារព្រំដែនគោក ជាគ្រឿងឧបភោគបរិភោគ ដែលដឹកនាំដោយលោកឧត្តមសេនីយ៍ទោ សាគុណ រិទ្ធី មេបញ្ជាការរងអចិន្រ្តៃយ៍ទទួលទិសភូមិភាគ១ ជាតំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ប្រធាននាយកដ្ឋានកណ្តាលនគរបាលការពារព្រំដែនគោក ទទួលទិសភូមិភាគទី១និងភូមិភាគទី២ ដែលបាននាំយកនូវអំណោយដ៏ថ្លៃថ្លាជាគ្រឿងឧបភោគបរិភោគរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ផ្តល់ជូនដល់កម្លាំងនគរបាលវរសេនាតូចនគរបាលការពារព្រំដែនគោក ចំនួន ០៣ខេត្ត ( ខេត្តមណ្ឌលគិរី រតនគិរី និងខេត្តស្ទឹងត្រែង) ដែលកំពុងឈរជើងនៅតាមខ្សែបន្ទាត់ព្រំដែន។
ស្នងការដ្ឋាននគបាលខេត្តមណ្ឌលគិរីទទួលបានអំណោយរួមមាន៖ មីចំនួន ១០០កេះ, ម៉ាស់ចំនួន ២៥០០ម៉ាស់ និងផ្លែតាង៉ែនចំនួន០៥កេះ។
ដោយឡែកឯកឧត្តម ឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី បានឧបត្ថម្ភទឹកអាកុលចំនួន៣០លីត្របន្ថែមដល់ វរសេនាតូចនគរបាលការពារព្រំដែនគោកលេខ៦២១ និង៣០៣ផងដែរ។
ចំណែកស្នងការដ្ឋាននគរបាលខេត្តរតនគិរី និងខេត្តស្ទឹងត្រែង ទទួលបានអំណោយជាគ្រឿងឧបភោគបរិភោគរួមមាន៖ មីចំនួន ១០០កេះ, ម៉ាស់ចំនួន ២៥០០ម៉ាស់ និងផ្លែតាង៉ែនចំនួន ០៥កេះ នាឱកាសនោះផងដែរ៕
