មណ្ឌលគិរី៖ នាព្រឹកថ្ងៃចន្ទ ១កើត ខែស្រាពណ៍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី០៩ ខែសីហា ឆ្នាំ២០២១ ឯកឧត្តម ឧត្តមសេនីយ៍ទោ ឡោ សុខាស្នងការដ្ឋាននគរបាលខេត្តមណ្ឌលគិរី បានដឹកនាំបើកកិច្ចប្រជុំតាមប្រព័ន្ធវីដេអូអនឡាញ (កម្មវិធី Zoom) ដេីម្បីពង្រឹងបន្ថែមដល់កម្លាំងនគរបាលនៃស្នងការដ្ឋាននគរបាលខេត្ត ត្រូវយកចិត្តទុកដាក់បង្ការទប់ស្កាត់នៃការរីករាលដាលមេរោគកូវីដ-១៩ ពិសេសមេរោគបំលែងខ្លួនប្រភេទថ្មី(Delta)។
អញ្ជេីញចូលរួមក្នុងកិច្ចប្រជុំនេះរួមមាន លោក លោកស្រី ស្នងការរង នាយការិយាល័យជំនាញ អធិការនគរបាលក្រុង-ស្រុកទាំង៥ មេបញ្ជាការវេសេនាតូចនគរបាលការពារព្រំដែនគោកទាំង២ នាយប៉ុស្តិ៍ច្រកទ្វារទ្វេភាគីទាំង៣ នាយប៉ុស្តិ៍នគរបាលរដ្ឋបាលទាំង២១ឃុំ-សង្កាត់ និងនាយប៉ុស្តិ៍នគរបាលការពារព្រំដែនគោកទាំង១៤ប៉ុស្តិ៍ សរុបអ្នចូលរួមចំនួន ៩៦នាក់។
ស្ថិតក្នុងកិច្ចប្រជុំនេះ ឯកឧត្តម ឧត្តមសេនីយ៍ទោស្នងការ បានមានប្រសាសន៍ពង្រឹងដល់កម្លាំងនគរបាលទាំងអស់ ត្រូវខិតខំយកចិត្តទុកដាក់តាមដានត្រួតពិនិត្យទៅលើមន្ត្រីក្រោមឱវាទឲ្យបានត្រឹមត្រូវនិងច្បាស់រាល់ការធ្វេីដំណេីរចេញចូលទៅតាមបណ្តាខេត្តផ្សេងៗ ឬក៏ចុះបេសកកម្មទៅតាមបណ្តាស្រុកណាមួយដែលកំពុងផ្ទុះជម្ងឺកូវីដ-១៩ និងមេរោគបំលែងខ្លួនប្រភេទថ្មី (Delta) ត្រូវតែទៅធ្វើតេស្តសំណាកជាបន្ទាន់ឲ្យបានត្រឹមត្រូវនិងច្បាស់លាស់ ដើម្បីទប់ស្កាត់កុំឲ្យមេរោគបំលែងខ្លួនថ្មីនេះមានការរីករាលដាលចូលដល់កម្លាំងនគរបាលរបស់យើង។
មិនតែប៉ុណ្ណោះឯកឧត្តម ឧត្តមសេនីយ៍ទោស្នងការ បានបញ្ជាក់និងមានប្រសាសន៍ឲ្យលោកឧត្តមសេនីយ៍ត្រី ស្នងការរងទទួលផែនការងារធនធានមនុស្ស ត្រូវខិតខំនិងយកចិត្តទុកដាក់ចុះសួរសុខទុក្ខនិងផ្តល់ថ្នាំព្យាបាលដល់មន្រ្តីនគរបាលដែលបច្ចុប្បន្នកំពុងសម្រាកព្យាបាលជម្ងឺកូវីដ-១៩ និងក្រុមគ្រួសាររបស់ពួកគាត់។
ទន្ទឹមគ្នានោះផងដែរ ឯកឧត្តម ឧត្តមសេនីយ៍ទោស្នងការ បានមានប្រសាសន៍និងមានការលើកសរសើរដល់កម្លាំងនគរបាលការពារព្រំដែនដែលខិតខំរក្សាសន្តិសុខ និងទប់ស្កាត់បទល្មើសគ្រប់ប្រភេទនៅតាមខ្សែបន្ទាត់ព្រំដែនកម្ពុជា-វៀតណាម ជាពិសេសការខិតខំទប់ស្កាត់នៃការឆ្លងដែនខុសច្បាប់របស់ប្រជាពលរដ្ឋនៃប្រទេសទាំងពីរ ក្នុងការបង្ការ ទប់ស្កាត់ការឆ្លងរីករាលដាលជម្ងឺ កូវីដ-១៩ចូលក្នុងសហគមន៍។
សូមឲ្យកងកម្ម្លាំងនគរបាលយេីងទាំងអស់ ត្រូវយកចិត្តទុកដាក់និងអនុវត្តនូវវិន័យរបស់កម្លាំងនគរបាលជាតិ ត្រូវមានការសហការគ្នាអនុវត្តការងារឲ្យទទួលបានលទ្ធផលល្អប្រសើរបន្ថែមទៀត និងត្រូវថែទាំរក្សាសុខភាពរបស់ខ្លួនឲ្យបានល្អប្រសើរ និងរួមគ្នាទប់ស្កាត់នៃការរីករាលដាលនូវមេរោគបំលែងខ្លួនប្រភេទថ្មី (Delta) ដែលមានការចម្លងបានលឿនដ៏កាចសាហាវនេះ៕
