មណ្ឌលគិរី៖ នាព្រឹកថ្ងៃទី២៦ ខែមិថុនា ឆ្នាំ២០២១ ឯកឧត្តម សាយ ម៉េងគីម សមាជិកយុវជនគណបក្សថ្នាក់កណ្តាល និងជាប្រធានក្រុមការងារយុវជនគណបក្សប្រជាជនកម្ពុជាខេត្តមណ្ឌលគិរី បានអមដំណេីរឯកឧត្តម ស្វាយ សំអ៊ាង ប្រធានគណៈកម្មាធិការគណបក្សខេត្តមណ្ឌលគិរី និងឯកឧត្តម ឧត្តមសេនីយ៍ទោ ឡោ សុខា ស្នងការខេត្ត លោក ហៀក សុផាន ប្រធានគណៈកម្មាធិការគណបក្សប្រជាជនកម្ពុជាក្រុងសែនមនោរម្យ សមាជិកក្រុមការងារយុវជនគណបក្សប្រជាជនកម្ពុជាខេត្ត ក្រុងសែនមនោរម្យ សង្កាត់ស្ពានមានជ័យ សង្កាត់រមនា និងសកម្មជនយុវជនភូមិចំការតែ ភូមិកណ្តាល និងភូមិពូលុង បានអញ្ជើញជួបសំណេះសំណាលសួរសុខទុក្ខ និងនាំយកគ្រឿងឧបភោគបរិភោគមួយចំនួនរួមមានអង្ករទឹកសុីអុីវ ប្រេងឆា ស្ករស អំបិល មី ត្រីខកំប៉ុង ផ្តល់ជូនប្រជាពលរដ្ឋចំនួន ៤៥គ្រួសារ រស់នៅតំបន់បិទខ្ទប់បណ្តោះអាសន្នមាន ០៣ទីតាំង ក្នុងនោះ នៅក្រោយផ្សារលឹម ប៉េងឃុន ចំនួន ៣១គ្រួសារ នៅភូមិកណ្តាលចំនួន ០៦គ្រួសារ និងភូមិពូលូងចំនួន ០៨គ្រួសារ ស្ថិតនៅក្រុងសែនមនោរម្យ ដែលប្រជាពលរដ្ឋបានប៉ះពាល់ដោយផ្ទាល់ និងប្រយោល ជាមួយអ្នកវិជ្ជមានកូវីដ-១៩ ពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ។
ឯកឧត្តម ស្វាយ សំអ៊ាង អភិបាលខេត្ត បានផ្តាំផ្ញើដល់ប្រជាពលរដ្ឋទាំងអស់ ត្រូវចូលរួមអនុវត្តវិធានការណ៍របស់អាជ្ញាធរមូលដ្ឋាន ក្រសួងសុខាភិបាល និងបទបញ្ជារបស់រាជរដ្ឋាភិបាលកម្ពុជា ជាពិសេស វិធានការ ៣កុំ ៣ការពារ របស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្រ្តី នៃព្រះរាជាណាចក្រកម្ពុជា ដើម្បីទប់ស្កាត់ និងប្រយុទ្ធប្រឆាំងនឹងជំងឺកូវីដ-១៩។
សូមបញ្ជាក់ថា គិតត្រឹមថ្ងៃទី២៥ ខែមិថុនានេះ ខេត្តមណ្ឌលគិរី បានរកឃើញអ្នកវិជ្ជមានជំងឺកូវីដ-១៩ សរុបចំនួន ១១៦ករណី ករណីឆ្លងថ្មី ៦ករណី ជាសះស្បើយចំនួន ០៧នាក់ ករណីស្លាប់ ០១នាក់ និងអ្នកកំពុងសម្រាកព្យាបាលជំងឺចំនួន ១០៨ករណី៕
