ថ្ងៃទី១៤ ខែមិថុនា ឆ្នាំ២០២១ ឯកឧត្តម ស្វាយ សំអ៊ាង អភិបាលខេត្តមណ្ឌលគិរី អមដំណើរដោយលោកអភិបាលរងខេត្ត ឯកឧត្តម ឧត្តមសេនីយ៍ទោ ឡោ សុខា ស្នងការនគរបាលខេត្ត លោកមេបញ្ជាការកងរាជអាវុធហត្ថខេត្ត រួមទាំងថ្នាក់ដឹកនាំមន្ទីរ អង្គភាពពាក់ព័ន្ធ និងអាជ្ញាធរដែនដី បានអញ្ជើញចុះពិនិត្យមើលទីតាំងកន្លែងបិទខ្ទប់មួយចំនួន និងសួរសុខទុក្ខដល់កងកម្លាំងដែលការពារនៅគោលដៅកន្លែងបិទខ្ទប់ នៅក្នុងភូមិសាស្ត្រក្រុងសែនមនោរម្យ ចំពោះអ្នកដែលប៉ះពាល់ដោយផ្ទាល់ និងដោយប្រយោល ក្នុងករណីរកឃើញអ្នកវិជ្ជមានជំងឺកូវីដ-១៩ កាលពីថ្ងៃទី១១ ខែមិថុនា ឆ្នាំ២០២១។
សូមបញ្ជាក់ជូនថា ខេត្តមណ្ឌលគិរី គិតត្រឹមថ្ងៃទី១៤ ខែមិថុនា ឆ្នាំ២០២១នេះ មានអ្នកឆ្លងមេរោគកូវីដ-១៩ សរុបចំនួន ២៣នាក់ ស្រីចំនួន ១៣នាក់ ក្នុងនោះដែរមានអ្នកស្លាប់ដោយសារជម្ងឺកូវីដ-៩ ចំនួន ០១នាក់ ៕
