បាត់ដំបង ៖ សំរាស់ដាក់យកត្រី ១ កន្លែង ជារបស់ឈ្មោះ ថៃ ជុង អាយ ៦២ ឆ្នាំ ដែលដាក់ក្នុងស្ទឹងសង្កែ បន្ទាប់ពីមានជម្លោះ ជាមួយអ្នកសារព័ត៌មាន រស្មីកម្ពុជា ត្រូវបានសមត្ថកិច្ចជលផល ក្រុងបាត់ដំបង ចុះបង្ក្រាបធ្វើការ រុះរើដុតបំផ្លាញ ចោល កាលពីម៉ោង ៩ ព្រឹកថ្ងៃទី ២៥ ខែមករា ឆ្នាំ២០១៤ ចំណុចស្ពានរថភ្លើង មុខវត្តកណ្តឹង ភូមិវត្តកណ្តឹង សង្កាត់វត្តគរ ក្រុងបាត់ដំបង ។
តាមប្រភពពីក្រុមអ្នកសារព័ត៌មាននៅបាត់ដំបង បានអោយដឹងថា កាលពីម៉ោង ៧ ព្រឹក លោក សំ ប៊ុនណាត អ្នកយកព័ត៌មាន រស្មីកម្ពុជា បានទទួល ទូរស័ព្ទ ១ ខ្សែ ពីឈ្មោះ ឃឹម វាសនា បុគ្គលិកសារព័ត៌មានចៅកំសត់ប្រាប់ថា សមត្ថកិច្ចជលផល ចុះបង្ក្រាប សំរាស់មុខវត្តកណ្តឹង ភ្លាមនោះ លោក សំប៊ុនណាត ក៏ចុះទៅកន្លែងនោះ ។
ពេលទៅដល់អ្នកយកព័ត៌មានរស្មីកម្ពុជា មានចាប់ថតរូបភាព ក៏ត្រូវឈ្មោះ ថៃ ជុង អាយ ៦២ ឆ្នាំជាម្ចាស់សំរាស់ មានទីលំនៅភូមិវត្តតាមឹម ឃុំអូរដំបង១ ស្រុកសង្កែ បានខឹងរករឿងនិងរកវាយអ្នកយកព័ត៌មាននេះ ។ ក្រោយមកទើបលោក សំ ប៊ុនណាត ទូរស័ព្ទទៅប្តឹងនគរបាល និងសមត្ថកិច្ចជលផល អោយចុះបង្ក្រាបតែម្តង ។
ឈ្មោះថា អាយុជាង ៣០ ឆ្នាំជាកូនប្រុសម្ចាស់សំរាស់ បានប្រាប់អ្នកយកព័ត៌មានថា ក្នុងនាមជាកូន មិនចង់អោយឪពុករកស៊ីដាក់សំរាស់នេះទេ ព្រោះអីទឹករាក់ មិនមានត្រីដុំកំភួនស្អីទេ តែដោយឪពុកខ្លួនមានជំងឺ បានសុំជលផលដាក់ សំរាស់ដោយមិនបានបង់ប្រាក់អ្វីទេ ។ ឪពុកខ្លួនមានដំបៅជាប់ខ្លួន គាត់ចង់ធ្វើការបែកញើស និងទ្រាំទឹកអោយផ្សះដំបៅគាត់ប៉ុណ្ណោះ ហើយសំរាស់នេះ បានលើកតាំងពីថ្ងៃទី ២៤ មករា ម៉្លេះ ហើយនៅព្រឹកថ្ងៃទី ២៥ មករានេះឪពុកខ្លួនបានរៀបដាក់សំរាស់ ទៅក្នុងទឹកវិញ ស្រាប់តែមានសារព័ត៌មានម្នាក់ឈ្មោះ វាសនា មកសុំត្រីហូប តាំងពីម៉ោង៦ព្រឹក ពេលអត់មានត្រី អោយក៏ទូរស័ព្ទហៅអ្នកផ្សេងមកថត ហើយឪពុកខ្លួនខឹង ក៏ប្រើសំដីមិនសមរម្រតែម្តងទៅ ។
លោក យឹម ហួរ នាយសង្កាត់ជលផល ក្រុងបាត់ដំបង បានអោយដឹងថា សំរាស់ដែលរើដាក់ក្នុងស្ទឹងសង្កែ របស់ឈ្មោះ ថៃ ជុង មានបង្គោល ១២ ដើមទំហំ ៤ គុណ ៥ ម៉ែត្រ ប្រើមែកអំពិលប្រហែល ៣០០ មែក ។ សមត្ថកិច្ចដោយមានការយោគយល់ សណ្តោសដល់ម្ចាស់សំរាស់ មានជំងឺប្រចាំកាយ បានអោយប្រកបរបរនេសាទនេះ ចិញ្ចឹមជីវិត តែបើមានរឿងហើយ គឺអនុវត្តន៍តាមផ្លូវច្បាប់ គឺរុះរើដុតបំផ្លាញចោលតែម្តង ៕
ភារម្យ
