ខេត្តប៉ៃលិន ៖ ប្រជាពលរដ្ឋចំនួន៦គ្រួសារ ដែលមានទំនាស់ដីធ្លី ជាមួយនឹងអ្នកមានលុយម្នាក់ ស្ថិតនៅព្រំប្រទល់ខេត្តទាំងពីរគឺក្នុងភូមិដីស្អិត ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ជាប់នឹងព្រំប្រទល់ភូមិត្រពាំងក្បាលស្វា ឃុំឃ្លាំងមាស ស្រុកបវេល ខេត្តបាត់ដំបង រហូតមកដល់ព្រឹកថ្ងៃទី២៤ ខែកក្កដា ឆ្នាំ២០១៥នេះ ត្រូវបានអាជ្ញាធរខេត្តទាំងពីរចុះធ្វើការវាស់វែងដោះស្រាយ ។ ប៉ុន្តែភាគីទាំងសងខាងមិនយល់ព្រមនោះឡើយ ដោយម្នាក់ៗមានប្លង់កាន់កាប់ ដោយជជែកយកត្រូវរៀងៗខ្លួន ហើយក៏ត្រូវអាជ្ញាធរខេត្តទាំងពីរផ្អាកមួយរយៈពេលសិន ដើម្បីនឹងជួបដោះស្រាយបន្តនៅសាលាឃុំស្ទឹងត្រង់ម្តងទៀត ។ ការចុះធ្វើការដោះស្រាយទំនាស់ដីធ្លីជូនប្រជាពលរដ្ឋនេះ មានការចូលរួមពីឯកឧត្តម ខឹយ ស៊ីណា សមាជិកក្រុមប្រឹក្សាខេត្តបាត់ដំបង លោកវ័រ រួម ជំទប់ទី១ ឃុំស្ទឹងត្រង់ ដោយមានការចូលរួមពីលោកស្រី ប្រាក់ សុភិមា ប្រធានអង្គការសិទ្ធិមនុស្សប្រចាំខេត្តប៉ៃលិនផងដែរ ។
ប្រជាពលរដ្ឋទាំង៦គ្រួសារ ទី១. ឈ្មោះ ផាត់ សុភាព ភេទប្រុស អាយុ៣៧ឆ្នាំ ទី២. ឈ្មោះ នឿ សាវ៉េត ភេទប្រុស អាយុ៤៨ឆ្នាំ ទី៣. ឈ្មោះ ផាត់ ឫទ្ធី ភេទប្រុស អាយុ៣៤ឆ្នាំ ទី៤. ឈ្មោះ ជួន នី ភេទប្រុស អាយុ៤៤ឆ្នាំ ទី៥. ឈ្មោះ ម៉ង់ សម្បត្តិ ភេទប្រុស អាយុ៥៣ឆ្នាំ និងទី៦. ឈ្មោះ វេទ ម៉ាលី ភេទស្រី អាយុ៣១ឆ្នាំ រស់នៅភូមិត្រពាំងក្បាលស្វា ឃុំឃ្លាំងមា ស ស្រុកបវេល ខេត្តបាត់ដំបង ។ ចំណែក អ្នកមានលុយម្នាក់ ឈ្មោះ យីប ស៊ីណា ភេទប្រុ ស អាយុ៥០ឆ្នាំ បច្ចុប្បន្នរស់នៅប្រទេសអូស្ត្រាលី ។
សូមបញ្ជាក់ថា ដីទំនាស់ចំនួន៥ហិកតានេះ ស្ថិតនៅភូមិដីស្អិត ឃុំស្ទឹងត្រង់ ស្រុក សាលាក្រៅ ខេត្តប៉ៃលិន ។
ឯកឧត្តម ខឹយ ស៊ីណា សមាជិកក្រុមប្រឹក្សាខេត្តបាត់ដំបង បានរៀបរាប់ឱ្យដឹងថា ដី ដែលមានទំនាស់នេះគឺខាងលោកបានចែកជូនប្រជាពលរដ្ឋដោយផ្ទាល់កាលពី ប៉ុន្មានឆ្នាំកន្លងទៅ ។ តែដីនេះស្ថិតនៅក្នុងទឹកដីខេត្តបាត់ដំបង លុះក្រោយមកក៏កាត់ចូលមកក្នុងខេត្ត ប៉ៃលិន ប៉ុន្តែម្ចាស់កម្មសិទ្ធិទាំង៦គ្រួសារខាងលើនៅតែកាន់កាប់ដដែល ។ រហូតមក ដល់ដើមឆ្នាំ២០១៥នេះ ស្រាប់តែមេការម្នាក់ ឈ្មោះ ឃុល សុខឃឿន ភេទប្រុស អាយុ៥៥ ឆ្នាំ បានប្រើកម្មករឱ្យយកគ្រឿងចក្រទៅជីកកកាយផលដំណាំប្រជាពលរដ្ឋ ហើយថែមទាំង យកប្លង់ថ្មីមួយ ដែលបោះត្រាដោយលោក វ័រ រួម ជំទប់ទី១ឃុំស្ទឹងត្រង់ ជាន់ពីលើប្លង់ របស់ប្រជាពលរដ្ឋទាំងនោះទៅវិញ ។ ឯកឧត្តមបញ្ជាក់ថា ទោះបីជាយ៉ាងណាក៏ដោយខាង លោកមិនចង់ឱ្យមានទំនាស់នោះឡើយ គឺត្រូវសម្របសម្រួលយកចំណុចមួយដែលប្រជាព លរដ្ឋអាចទទួលយកបាន គឺសុំផ្អាកដំណើរការដោះស្រាយ ដើម្បីយកទៅពិភាក្សានៅសាលាឃុំស្ទឹងត្រង់ រង់ចាំដោះស្រាយនៅថ្ងៃក្រោយបន្តទៀត ។
ចំណែកប្រជាពលរដ្ឋទាំង៦គ្រួសារបានឱ្យដឹងថា ដីនេះពួកគាត់បានកាន់កាប់តាំងពី ឆ្នាំ២០០៧មកម្លេះ ហើយខំប្រឹងកាប់ឆ្ការព្រៃរហូតដល់ស្រឡះល្អ មេការខាងលើបានយកអេស្កាវ៉ាទ័រទៅឈូសឆាយរយៈពេល៣លើកមកហើយ រហូតដល់ប្រជាពលរដ្ឋនាំគ្នាធ្វើការ ឃាត់មិនឱ្យបន្តហើយក៏ដាក់ពាក្យប្តឹងទៅអាជ្ញាធរខេត្តទាំងពីរឱ្យ ចុះទៅដោះស្រាយតែម្តង ៕
