ខេត្តមណ្ឌលគិរី ៖ នារសៀលថ្ងៃចន្ទទី២២ ខែមីនា ឆ្នាំ២០២១ កាកបាទក្រហមកម្ពុជា តែមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានបន្តរៀបចំពិធីប្រគល់-ទទួលថវិកាសប្បុរសជន ក្រោមអធិបតីភាព ឯកឧត្តម ម៉ែន ងុយ អនុប្រធានកិត្តិយសសាខាកាកបាទក្រហមកម្ពុជា ខេត្តមណ្ឌលគិរី និង ឯកឧត្តម ស្វាយ សំអ៑ាង ប្រធានគណៈកម្មាធិការសាខា ដោយរួមមានវត្តមានរបស់ លោកជំទាវ វិន ស៉ីធួន អនុប្រធានគណៈកម្មាធិការសាខា លោក រួមជាមួយនឹង សមាជិក គណៈកម្មាធិការសាខា មន្ទីរអង្គភាពពាក់ព័ន្ធជុំវិញខេត្ត និងអាជីវករជាច្រើនរូប ដែលធ្វើឡើងនៅសាលប្រជុំសាខាកាកបាទក្រហមកម្ពុជាខេត្តមណ្ឌលគិរី។
ពិធីប្រគល់-ទទួលនេះ ប្រព្រឹត្តទៅនៅក្នុងគោលបំណង ដើម្បីឈានឆ្ពោះទៅរកការប្រារព្ធអបអរខួបទី១៥៨ ទិវាពិភពលោកកាកបាទក្រហមអឌ្ឍចន្ទក្រហម ៨ ឧសភា ២០២១ ក្រោមប្រធានបទ “ទាំងអស់គ្នារួមជាមួយកាកបាទក្រហមកម្ពុជា ប្រយុទ្ធនឹងជំងឺកូវីដ-១៩ និង កសាងភាពធន់របស់សង្គមជាតិ”។
ឯកឧត្តម ស្វាយ សំអ៊ាង ប្រធានគណៈកម្មាធិការសាខា បានថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ ដែលតែងតែចូលរួមឧបត្ថម្ភគាំទ្រ ក្នុងការកៀរគររកមូលនិធិពីសប្បុរសជនក្នុងស្រុក និងក្រៅខេត្ត គ្រប់មជ្ឈដ្ឋាន។
ឯកឧត្តម ក៏បានបញ្ជាក់បន្ថែមថា ថវិកាដែលទទួលបានពីសុខប្រជុំទាំងអស់នេះ សាខានឹងយកទៅចាត់ចែងទៅតាមគោលការណ៍ និងឆ្លើយតបឲ្យបានទាន់ពេលវេលា ក្នុងការជួយជនរងគ្រោះ និងអ្នកដែលត្រូវការជំនួយជាចាំបាច់ និងសូមជូនពរដល់សប្បុរសជនទាំងអស់ ដែលរួមមាន បុគ្គលិក មន្ត្រីរាជការ អង្គភាព ឬក្រុមហ៊ុន និងអាជីវករ ព្រមទាំងប្រជាពលរដ្ឋទូទាំងប្រទេស ក៏ដូចជាក្នុងខេត្តមណ្ឌលគិរីនេះដែរ សុខភាពល្អ កម្លាំងពលំមាំមួន រកស៊ីមានបាន មានសេចក្ដីសុខសុភមង្គល និងជៀសឲ្យផុតពីជំងឺដ៏កាចសាហាវមួយនេះ ដោយអនុវត្តវិធានការ ៣ការពារ ៣កុំ តាមអនុសាសន៍របស់រាជរដ្ឋាភិបាលកម្ពុជា និងស្ដាប់តាមការណែនាំរបស់ក្រសួងសុខាភិបាល៕
