តាកែវ៖ អស់រយៈពេលជាច្រើនឆ្នាំមកនេះ លោក ថៃ លី ប្រធានការិយាល័យ ផលិទ្ធកម្មនិងបសុព្យាបាលនៃមន្ទីរកសិកម្មខេត្តតាកែវ បានសប្បាយក្នុងការប្រមូលប្រាក់ដែលទទួលបានតាមរយៈការប្រព្រឹត្តិអំពើ ពុករលួយនិងការជំរិតទារប្រាក់ពីក្រុមឈ្មួញនាំគោក្របីទៅលក់នៅ ប្រទេសវៀតណាមនិងក្រុមឈ្មួញដែលនាំជ្រូក មាន់ ទា និងស៊ុតពីប្រទេសវៀតណាមមកលក់នៅប្រទេសកម្ពុជា បានប្រាក់ដ៏ច្រើនសន្ធឹកសន្ធប់ដែលអាចធ្វើអោយជីវៈភាពរបស់គាត់អភិវឌ្ឍន៍យ៉ាងឆាប់រហ័ស។
តាមប្រភពបានអោយដឹងថា តាំងពីពេលមុនរហូតមកដល់ពេលបច្ចុប្បន្ន គឺលោក ថៃ លី បានបង្កើតប៉ុស្តិ៍កុងត្រូលជជុះចំនួនពីរកន្លែង មួយកន្លែងនៅក្នុងឃុំពេជ្រសារ និងមួយទៀតនៅក្នុងឃុំកំណប់ ស្រុកគីរីវង្ស ខេត្តតាកែវ ជាប់ព្រ៉ុំដែនជាមួយប្រទេសវៀតណាម។ ហើយប៉ុស្តិ៍ជជុះទាំងពីរកន្លែងនេះគឺគ្មានភារៈកិច្ចអ្វីក្រៅតែពី ការចាំរាប់ចំនួនគោ ក្របីដែលឈ្មួញនាំទៅលក់នៅប្រទេសវៀតណាមនិងចាំរាប់ចំនួនជ្រូក មាន់ ទា និងស៊ុតដែលឈ្មួញនាំចូលពីប្រទេសវៀតណាមតាមច្រករបស់ខ្លួនដើម្បី យកប្រាក់ ដោយក្រុមពេទ្យសត្វរបស់លោកថៃ លី ដែលមានឈ្មោះ សួន ប៊ុនធឿន ជាមន្ត្រីជំនិតគឺមិនបានត្រួតពិនិត្យជ្រូក មាន់ ទា និងស៊ុត ដែលនាំចូលពីប្រទេស វៀតណាម ថាមានសុខភាពល្អឬអត់នោះទេ ដោយពួកគេគឺចាំតែរាប់ចំនួនដើម្បីយកលុយពីឈ្មួញតែប៉ុណ្ណោះ។
តាមប្រភពបានអោយដឹងថា នៅច្រកទាំងពីរខាងលើក្នុងមួយថ្ងៃៗគឺឈ្មួញបាននាំគោនិងក្របីទៅលក់ នៅប្រទេសវៀតណាមមានចំនួនរាប់រយក្បាល ហើយក្នុងមួយក្បាលៗគឺឈ្មួញបានបង់ប្រាក់ទៅអោយក្រុមពេទ្យសត្វ ដែលជាកូនចៅរបស់លោក ថៃ លី ក្នុងតម្លៃ៨៥០០០រៀល ទៅ១០៦០០០រៀល ។ ហើយសម្រាប់ការនាំចូលជ្រូក មាន់ ទា និងស៊ុតក្នុងមួយថ្ងៃៗគឺឈ្មួញបាននាំចូលពីប្រទេសវៀតណាមរាប់សិប តោន នៅពេលមកដល់ច្រកខាងលើគឺគេកំរឃើញក្រុមពេទ្យសត្វទាំងនោះ ធ្វើការ ពិនិត្យអំពីសុខភាពសត្វជ្រូក មាន់ ទា និងស៊ុតទេ ដោយភាគច្រើនឃើញតែក្រុមមន្ត្រីពេទ្យសត្វចាំយកតែលុយពីឈ្មួញដោយ ពួកគេមិនខ្វល់ពីជំងឺរាលដាល និងសុខភាពរបស់ប្រជាពលរដ្ឋកម្ពុជាឡើយ។
តាមប្រភពបានអោយដឹងទៀតថាដោយសារតែមានអំពើពុករលួយគិតតែពីផលប្រយោជន៍ គឺលោក ថៃ លី បានទទួលប្រាក់យ៉ាងច្រើនក្នុងមួយថ្ងៃៗរាប់លានរៀល ហើយប្រាក់មួយចំនួនត្រូវបានលោក ថៃ លី បែងចែកអោយទៅកំលាំងប៉ូលីសនិងបេអឹមដែលធ្វើការសហការណ៍ជាមួយ ពេទ្យសត្វក្នុងការបង្ក្រាបក្រុមឈ្មួញដែលរឹងទទឹងគេចវេសមិនបង់ ប្រាក់អោយក្រុមពេទ្យសត្វនៅពេលឆ្លងកាត់ប៉ុស្តិ៍របស់ពួកគេ មួយចំនួនទៀតគឺបែងចែកអោយទៅមន្ត្រីមានអំណាចនៅក្នុងមន្ទីរកសិកម្ម និងថ្នាក់ដឹកនាំខេត្តតាកែវផងដែរ។ ដោយសារតែមានការឃុបឃិតគ្នាលក្ខណៈជាប្រព័ន្ធទើបលោក ថៃ លី អាចបង្កព្យុះភ្លៀងបានតាមអំពើចិត្តដោយមិនខ្លាចក្រែងច្បាប់
នោះ។
ករណីរឿងអាស្រូវខាងលើរបស់លោក ថៃ លី ប្រសិនបើលោករដ្ឋមន្ត្រីក្រសួងកសិកម្ម អ៊ុក រ៉ាប៊ុន និងថ្នាក់ដឹកនាំក្រសួងពាក់ព័ន្ធមិនប្រញាប់ចាត់វិធានការអោយធ្ងន់ធ្ងរ លើបុគ្គលរូបនេះទេនោះប្រជាពលរដ្ឋកម្ពុជានិងទទួលរង់គ្រោះ ដោយសារតែនាំជ្រូក មាន់ ទា និងស៊ុតពីប្រទេសវៀតណាមចូលមក ដោយពុំមានការត្រួតពិនិត្យសុខភាពនេះ ជាមិនខាន់។ ហើយក្រៅពីនោះក៏បានធ្វើអោយបាត់បង់នៅចំណូលថវិកាជាតិពីការងារ ទាំងនេះដោយសារតែអំពើពុករលួយ
របស់លោក ថៃ លី និងបក្ខពួក។
ទាក់ទងព័ត៌មាននេះ អ្នកយកព័ត៌មានយើងបានទូរស័ព្ទសូមការបំភ្លឺពីលោក ថៃ លី ដែរតែទូរស័ព្ទចូលជាច្រើនលើកដោយគ្មានអ្នកទទួល។ ចំណែកលោកប្រធានមន្ទីរកសិកម្មខេត្តតាកែវ ញឹប ស្រ៊ន ក៏ពុំអាចទំនាក់ទំនងបាន ៕
