បាត់ដំបង ៖កាលវេលាម៉ោង ១១ ថ្ងៃត្រង់កាលពីថ្ងៃទី១២ ខែកុម្ភៈ ឆ្នាំ២០១៥ត្រង់ចំណុចក្បែរផ្លូវរថភ្លើង ស្ថិតក្នុងភូមិទួលតាឯក សង្កាត់ទួលតាឯក ក្រុងបាត់ដំបង មានរថយន្តមួយគ្រឿងម៉ាកហ្វុយសូដឹកភេសជ្ជៈខារ៉ាបាវចំនួន ២០០ កេស ពីក្រុងភ្នំពេញ មកខេត្តបាត់ដំបង ត្រូវម្ចាស់ក្រុមហ៊ុន តាំង សេងហួត ប្តឹងទៅនគរបាលនាយកដ្ឋានប្រឆាំងបទល្មើសសេដ្ឋកិច្ច ពីបទរំលោភសិទ្ធបញ្ញា ដោយបញ្ជារកម្លាំងនគរបាលការិយាល័យប្រឆាំងបទល្មើសសេដ្ឋកិច្ចខេត្ត សហការជាមួយកម្លាំងបង្ការបង្ក្រាបឃាត់រថយន្ត ។
លោក វរសេនីយ៍ឯក ម៉ៅ រង្សី នាយការិយាល័យនគរបាលប្រឆាំងបទល្មើសសេដ្ឋកិច្ចបានមានប្រសាសន៍ថា ក្រោយពីទទួលបាននូវពាក្យបណ្ដឹងរបស់ក្រុមហ៊ុនតាំងសេងហួតនាំចូល ផ្ដាច់មុខនៅ ទំនិញភេសជ្ជៈខារ៉ាបាវ និងមានគេដឹកជញ្ជូនមកខេត្តបាត់ដំបងបានបំពាននឹងច្បាប់ កម្មសិទ្ធិបញ្ញានោះ រូបលោកបានចាត់កម្លាំងស្រាវជ្រាវនិងកំណត់មុខសញ្ញាហើយក៏ដឹកនាំ កម្លាំងបង្ការបង្ក្រាបនៃការិយាល័យព្រហ្មទណ្ឌកម្រិតស្រាលចេញ ប្រតិបត្តិការល្បាតគ្រប់ច្រកល្ហកក្នុងក្រុងបាត់ដំបង ក៏បានប្រទះឃើញមានរថយន្តមួយគ្រឿងម៉ាកFusoពាក់ស្លាកលេខបាត់ដំបង 3A0885 ដោយមាន ផ្ទុកទំនិញពេញរថយន្ត ក្នុងនោះក៏មានភេសជ្ជៈខារ៉ាបាវជាច្រើនកេះផងដែរ រួចនាំយកមកសាកសួរតែម្តង។
ឈ្មោះ ខន សុខុម ហៅសំអូន ភេទប្រុស អាយុ៣២ ឆ្នាំអ្នកបើកបររថយន្តនិងព្រូរថយន្តឈ្មោះ លឹម ប៊ុនធឿន ភេទប្រុស អាយុ៣៤ឆ្នាំ អ្នកទាំងពីររស់នៅភូមិខ្នាចរមាសឃុំខ្នាចរមាសស្រុកបវេលខេត្ត បាត់ដំបងបានអោយដឹងថាពួកខ្លួនមានមុខរបរស៊ីឈ្នួលបើករថយន្តឲ្យឈ្មោះ ឈី រស់នៅភូមិនរាឃុំនរា ស្រុកសង្កែ គឺដឹដងតែបើករថយន្តទៅដឹកទំនិញមិនបានដឹងភេសជ្ជៈខារ៉ាបាវចំនួន ២០០កេសខាងលើជារបស់ក្លែងក្លាយឬខុសច្បាប់ទេ ។
ខារ៉ាបាវនេះដឹកចេញពីចំណុចឃ្លាំងស្តុកឡោ ម៉េងហ៊ួត ដែលមានទីតាំងនៅក្បែរផ្ទះប្អូនប្រាក់ លីហ៊ួរន តាមបណ្តោយផ្លូវជាសុផារ៉ា រាជធានីភ្នំពេញយកមកប្រគល់ឲ្យឈ្មោះ អ៊ឹម សេង ជាអាជីវករលក់ទំនិញនៅភូមិទួលតាឯក ហើយក៏ត្រូវសមត្ថកិច្ចជំនាញឃាត់តែម្តង។
លោកជេតវណ្ណនីស្នងការរងកណ្តាលយុត្តិធម៌បានអោយដឹងថាការដឹកនាំ បង្ក្រាបមិនថាបទល្មើសសិទ្ធបញ្ញានោះទេអោយតែថ្នាក់លើដាក់ផែនការ រូបលោកនិងដឹកនាំកម្លាំងចុះប្រតិបត្តិការភ្លាម។
លោក ឡុង ស្រេង ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចបានអោយដឹងថា ភេសជ្ជៈខារ៉ាបាវរបស់ក្រុមហ៊ុនតាំងសេងហួត នាំចូលផ្តាច់មុខមានដាក់អក្សរខ្មែរ នៅជាប់កំប៉ុង ចំណែកភេសជ្ជៈខារ៉ាបាវចំនួន២០០កេស ដែលឃាត់បានមានអក្សរបរទេស និងដឹកជញ្ជូនចែកចាយលក់គ្មានការអនុញ្ញាតពីក្រុមហ៊ុន ។ បច្ចុប្បន្នអ្នកបើកបរនិងសម្ភារៈដែលឃាត់បានត្រូវកសាងសំណុំរឿង បញ្ជូនទៅតុលាកាដោះស្រាយតាមនិតិវិធី ៕
