សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក មានប្រសាសន៍ថា ថវិកាលើកចិត្តចំពោះនគរបាលដែលផាកពិន័យពីអ្នកមិនគោរពច្បាប់ចរាចរណ៍ គឺបើកតាមរយៈធនាគារ ប៉ុន្ដែបើនគរបាលណាមួយមិនទទួលបានថវិកានេះ ត្រូវរាយការណ៍ជូនសម្ដេចភ្លាមៗ ដើម្បីមានវិធានដោះស្រាយជូនពួកគាត់។
សម្តេចក្រឡាហោម ស ខេង មានប្រសាសន៍បែបនេះ ក្នុងពិធីទិវាអន្ដរជាតិរំលឹកដល់ជនរងគ្រោះ ដោយគ្រោះថ្នាក់ចរាចរណ៍ផ្លូវគោក លើកទី១៥ ដែលប្រារព្ធធ្វើនៅសួនច្បារមាត់ទន្លេ ក្រុងតាខ្មៅ ខេត្តកណ្តាល នាថ្ងៃទី២ ខែកុម្ភៈ ឆ្នាំ២០២១។
សម្ដេចក្រឡាហោម ស ខេង បានបញ្ជាក់ថា ថវិកាមួយចំនួនដែលបានផាកពិន័យពីច្បាប់ចរាចរណ៍ គឺត្រូវបានផ្ដល់មកឲ្យនគរបាលចរាចរណ៍ និងកងរាជអាវុធហត្ថ ហើយថវិកាទាំងនោះមិនបើកតាមរយៈអង្គភាពរបស់ខ្លួនឡើយ គឺម្នាក់ៗត្រូវមានគណនីធនាគាររៀងៗខ្លួន។ សម្ដេចក្រឡាហោម ឧទាហរណ៍ថា «បើថវិកាមិនដល់នគរបាល យើងអ្នកទទួលខុសត្រូវដដែរ»។
សម្ដេចក្រឡាហោម មានប្រសាសន៍ថា «ប៉ុន្ដែបើករណីអស់លោក (នគរបាលចរាចរណ៍) បើកលុយនៅធនាគារមិនបាន ព្រោះលុយក្នុងកុងអត់មាន សូមរាយការណ៍មកខ្ញុំ ហើយខ្ញុំបើកចំហរប្ដឹងមកខ្ញុំ ខ្ញុំនឹងទទួលដោះស្រាយ ប្រកបដោយភាពត្រឹមត្រូវ និងតម្លាភាព»។
បន្ថែមពីនេះទៀត សម្ដេចក្រឡាហោម ក៏បានរំលឹកថា នាពេលកន្លងមកនៅខេត្តមួយចំនួន ក៏មានករណីដូចខាងលើនេះដែរ ប៉ុន្ដែត្រូវបានដោះស្រាយជាបន្ដបន្ទាប់៕
