ប្រភពព័ត៌មានបានប្រាប់ឱ្យដឹងថា ឈ្មួញឈើដ៍ល្បីល្បាញ រ័ត្ន ចាន់ណា ដែលជាមេបញ្ជាការរង កងរាជអាវុធហត្ថ ខេត្តត្បូងឃ្មុំ ទើបបង្កើតឡើងថ្មីនោះ គាត់មានមនុស្សជំនិត ២នាក់ គឺឈ្មោះលីននិងឈ្មោះវុធឱ្យ ប្រមូលទិញ និងដឹកជញ្ជូនឈើប្រណីតៗ យ៉ាងអនាធិបតេយ្យ ស្ទើររាល់យប់ថ្ងៃ យកទៅលក់នៅ ប្រទេសវៀតណាម តាមច្រកដូនរ័ត្ន, ច្រកទន្លេចាម ច្រកចាន់មូល, ច្រកបឹងជ្រោង និងច្រកជាំក្រវៀន… ជាដើម ដើម្បីប្រយោជន៍ផ្ទាល់ខ្លួន និងបក្ខពួកមួយក្តាប់តូច ដោយមិនខ្វល់ពីបទបញ្ជា របស់ សម្តេច ហ៊ុន សែន នាយករដ្ឋមន្ត្រី ក៏ដូចជាការណែនាំ របស់លោក នាយឧត្តមសេនីយ៍ សៅ សុខាមេបញ្ជាការ កងរាជអាវុធហត្ថ លើផ្ទៃប្រទេសផងដែរ ។
តាមប្រភពបានបញ្ជាក់ថា បន្ទាប់ពីបានឡើង ជាមេបញ្ជាការរង កងរាជអាវុធហត្ថ ខេត្តត្បូងឃ្មុំរួចហើយ… មេបញ្ជាការរងរូបនេះ ក៍បានផ្លាស់ប្តូររូបភាពពីការ «រកស៊ីដឹកជញ្ជូនឈើ ដោយខ្លួនឯង ទៅជាការប្រើប្រាស់ ដៃជើងកូនចៅឱ្យ រកស៊ីដឹកជញ្ជូនឈើជំនួសខ្លួន (រ័ត្ន ចាន់ណា) វិញ» ដើម្បីឱ្យគេមើលឃើញថា ខ្លួន (រ័ត្ន ចាន់ណា ) លែងរកស៊ីដឹកជញ្ជូនឈើ ដូចកាលនៅធ្វើជាមន្ត្រី កងរាជអាវុធហត្ថស្នាក់ការ ៧០១ ទៀតហើយ ។ ប៉ុន្តែផ្ទុយទៅវិញ គេបានដឹងថា មេបញ្ជាការរងរ័ត្ន ចាន់ណានៅតែ និងតែងតែបានប្រើប្រាស់ មនុស្សជំនិតៗរបស់ខ្លួន ឱ្យរកស៊ីដឹកជញ្ជូនឈើ… ដោយមានរូបគាត់ (រ័ត្ន ចាន់ណា) ជាអ្នកកាងពីក្រោយខ្នង ចាំជួយដោះស្រាយ បញ្ហាទាំងឡាយ សម្របសម្រួល ជាមួយសមត្ថកិច្ច ពាក់ព័ន្ធគ្រប់ជំនាញ ។
ប្រជាពលរដ្ឋ នាំគ្នានិយាយរិះគន់ថា មានមន្ត្រីមួយចំនួន ក្នុងជួរកម្លាំងប្រដាប់អាវុធ បាននិងកំពុងរកស៊ី ប្រព្រិត្តបទល្មើស ព្រៃឈើខុសច្បាប់ ជាការផ្ទុយទាំងស្រុង ទៅនឹងតួនាទីរបស់ខ្លួន ដែលថ្នាក់លើបានប្រគល់ជូន… ជាក់ស្តែងដូចជាឈ្មោះ រ័ត្ន ចាន់ណាមានតួនាទីជាមន្ត្រី កងរាជអាវុធហត្ថ ស្នាក់ការសន្តិសុខលេខ ៧០១ ជាដើម ។បន្ថែមពីលើនេះ លោក នាយឧត្តមសេនីយ៍ សៅ សុខាមេបញ្ជាការ កងរាជអាវុធហត្ថ លើផ្ទៃប្រទេស ក៍តែងបានធ្វើការណែនាំ ចំពោះមន្ត្រីៗកងរាជអាវុធហត្ថ នៅគ្រប់លំដាប់ថ្នាក់ និងគ្រប់រាជធានី / ខេត្ត ជារឿយៗដែរថា …មិនត្រូវឃុបឃិត ប្រព្រិត្តបទល្មើសផ្សេងៗ ដូចជាបទល្មើសព្រៃឈើ… ៘ ធ្វើឱ្យប៉ះពាល់ដល់ កិត្តិយសអង្គភាព ជាដាច់ខាត… ។
គួររម្លឹកថា កន្លងមកសម្តេចតេជោ ហ៊ុន សែន នាយករដ្ឋមន្ត្រី តែង បានអំពាវនាវផង និងព្រមានខ្លាំងៗ ជាបន្តបន្ទាប់ផងថា… សូមឱ្យថ្នាក់ដឹកនាំ, មន្ត្រីរាជការទាំងឡាយ និងកងកម្លាំងប្រដាប់ អាវុធគ្រប់ប្រភេទ ត្រូវតែបញ្ឈប់ ឬដកខ្លួនជាបន្ទាន់… កុំឱ្យជាប់ពាក់ព័ន្ធនឹង បទល្មើសព្រៃឈើ… បើមិនអញ្ចឹងទេ នឹងត្រូវដកបុណ្យសក្តិ ឬធ្លាក់ពីតំណែង… ដែលអាចឈានដល់ចាប់ខ្លួន បញ្ជូនទៅឱ្យតុលាការ កាត់ទោសដាក់គុក ជាមិនខានទៀតផង ។ ហេតុដូច្នេះហើយ ប្រជាពលរដ្ឋ បានសំណូមពរថា សូមឱ្យលោកនាយឧត្តមសេនីយ៍ សៅសុខាមេបញ្ជាការកងរាជអាវុធហត្ថលើផ្ទៃប្រទេសនិងលោកប្រាជ្ញច័ន្ទ អភិបាលខេត្តត្បូងឃ្មុំ ព្រមទាំងលោក វ៉ា សារិទ្ធមេបញ្ជាការ កងរាជអាវុធហត្ថ ខេត្តត្បូងឃ្មុំ មេត្តាចាត់វិធានការក្តៅទៅលើ មេបញ្ជាការរង កងរាជអាវុធហត្ថ ខេត្តត្បូងឃ្មុំឈ្មោះរ័ត្ន ចាន់ណា ។
ពាក់ព័ន្ធនឹងករណីខាងលើសារព័ត៌មានយើងមិនអាចទំនាក់ទំនងសុំការបំភឺ ពីលោក រ័ត្ន ចាន់ណា, លោក លីន និងលោក វុធ បានទេនៅពេលនេះ ។/
