ខេត្តស្ទឹងត្រែង ៖ បន្ទាប់ពីមានការផ្លាស់ប្តូរមុខតំណែងរវាងលោក ស៊ឹម វណ្ណា ដែលជាអតីតៈមេបញ្ជាការ កងរាជអាវុធហត្ថ ស្រុកសៀមប៉ាង ជំនួសដោយលោក តេង រីណូ ជាមេប៉េអឹមស្រុកសៀមប៉ាងថ្មីមក មានញត្តិគាំទ្ររបស់ ក្រុមប្រឹក្សាឃុំ និងប្រជាពលរដ្ឋជាច្រើននាក់ក្នុងឃុំទាំង ៥ បានសម្តែងនូវការសោកស្តាយ អាឡោះអាល័យយ៉ាងខ្លាំង ចំពោះការដឹកនាំ និងស្នាដៃ ដែលលោក ស៊ឹម វណ្ណា បានអនុវត្តការងារកន្លងមក ធ្វើឱ្យពួកគាត់ទាំងឡាយទទួលបាននូវសុខសន្តិភាព ជាបន្តបន្ទាប់ហើយក៏បានសំណូមពរផងដែរ ទៅដល់ថ្នាក់ដឹកនាំ ខាងលើ សូមមេត្តាពិនិត្យ និងទុកឱ្យលោក ស៊ឹម វណ្ណា នៅជាមេប៉េអឹមស្រុកសៀមប៉ាងដដែល ។
ការផ្លាស់ប្តូរមុខតំណែងលោក ស៊ឹម វណ្ណា ចេញជំនួសដោយអ្នកថ្មីចូលអាចនឹងខាតបង់សន្លឹកឆ្នោតយ៉ាងច្រើន សម្រាប់អាណត្តិបោះឆ្នោតនាពេលក្រោយ ។ ពីព្រោះលោក ស៊ឹម វណ្ណា បានបន្សល់ទុកនូវសមិទ្ធផល និងស្នាដៃជាច្រើន ជាពិសេសបានជួយដោះស្រាយនូវទុក្ខលំបាករបស់ប្រជាពលរដ្ឋសម្រេចបានជោគជ័យជាបន្តបន្ទាប់ ។ ហើយការបោះឆ្នោត កន្លងមកក៏ទទួលបានសន្លឹកយ៉ាងច្រើនផងដែរ ដោយសារលោក ស៊ឹម វណ្ណា ជាប្រធានក្រុមការងារបក្សកងរាជអាវុធហត្ថស្រុកសៀមប៉ាង និងជាអនុប្រធានក្រុមការងារបក្សឃុំព្រែកមាស ហើយក៏ជាប្រធានក្រុមការងារបក្សភូមិខាំភោគផងដែរ ។
សកម្មភាពការងារ និងសមិទ្ធផលនានាដែលលោក ស៊ឹម វណ្ណា បានចូលរួមចំណែកកសាងទាំងផ្នែកពុទ្ធចក្រ និងអាណាចក្រមានដូចជា កសាងទីបញ្ជាការដ្ឋានកងរាជអាវុធហត្ថស្រុកបាន ១ខ្នង មាន៣បន្ទប់ ធ្វើពីឈើប្រក់ស័ង្កសី ទំហំ ៦ គុណនឹង ១២ម៉ែត្រ, កសាងអគារកងទ័ពស្នាក់នៅបាន ១ខ្នង ទំហំ ៦ គុណនឹង ១២ម៉ែត្រ ធ្វើពីឈើប្រក់ស័ង្កសី។
ក្នុងនោះដែរក៏បានកសាងអគាររោងបាយ ១ខ្នង ទំហំ ៤ គុណនឹង ៨ម៉ែត្រ ធ្វើពីឈើប្រក់ស័ង្កសី, កសាងអគារសម្រាប់ទទួលភ្ញៀវបាន ១ខ្នង ទំហំ ៧ គុណនឹង ៨ម៉ែត្រ ធ្វើពីឈើប្រក់ស័ង្កសី និងបានធ្វើបន្ទប់ទឹក បាន ២បន្ទប់, បង្គន់អនាម័យបាន ២បន្ទប់ ធ្វើពីថ្មប្រក់ស័ង្កសី និងបានសាងសង់របងក្លោងទ្វារទៀតផង ។
ក្រៅពីនេះ លោក ស៊ឹម វណ្ណា ក៏បានយកចិត្តទុកដាក់ផងដែរ ក្នុងការស្វែងរកថវិកាពីសប្បុរសជននានា ជាពិសេសនៅក្នុងអង្គភាព ដើម្បីជួសជុលស្ពានក្នុងសហគមន៍ក្នុងស្រុកដែលមានសភាពចាស់ទ្រុឌទ្រោមឱ្យមានដំណើរការល្អ ឡើងវិញងាយស្រួលក្នុងការធ្វើដំណើរចុះឡើងរបស់ប្រជាពលរដ្ឋ ។ ក្នុងនោះដែរ លោក ស៊ឹម វណ្ណា ក៏បានចលនាសប្បុរសជន នានា និងក្នុងអង្គភាពផ្ទាល់ជួយឱ្យឧបត្ថម្ភជាស៊ីម៉ង់ត៍, ខ្សាច់, គ្រួស ឈ្នួលជាងដើម្បីជួយចាក់សាប ទីធ្លាវត្តទួលរលួស (ហៅវត្តផាបាំង)ផងដែរ ៘
គួររំលឹកថា ការប្រកាសផ្ទេរមុខតំណែងកន្លងមកនេះ ធ្វើដោយតក់ក្រហល់ហាក់បីដូចជា ដណ្តើមអំណាចគ្នា ឬក៏ការ និយមបក្ខពួក ពីព្រោះមុនពេលប្រកាសមុខតំណែងលោក ស៊ឹម វណ្ណា មានធុរៈសុំច្បាប់ដោយសារកូនមានជំងឺ តែទោះបីលោក ស៊ឹម វណ្ណា សុំច្បាប់ហើយក្តីក៏គេនៅតែប្រជុំប្រកាសមុខតំណែងដដែល ។
នៅក្នុងលិខិតអញ្ជើញរបស់អភិបាលខេត្តស្ទឹងត្រែង មានខ្លឹមសារថា សូមគោរពអញ្ជើញលោកមេបញ្ជាការកងរាជ អាវុធហត្ថស្រុកសៀមប៉ាង ដើម្បីចូលរួមក្នុងពិធីផ្ទេរតំណែងនាយអាវុធហត្ថខេត្ត កាលបរិច្ឆេទថ្ងៃទី ៥ ខែឧសភា ឆ្នាំ២០១៤ វេលាម៉ោង ៨ៈ០០នាទី នៅទីបញ្ជាការដ្ឋានកងរាជអាវុធហត្ថខេត្ត ចុះហត្ថលេខាដោយលោក ដួង ពៅ នាយករដ្ឋបាលសាលា ខេត្តជំនួសលោកអភិបាលខេត្ត ។
បើពិនិត្យមើលលើខ្លឹមសារនៃលិខិតនោះដូចពុំមែនជាការផ្ទេរតំណែងលោក ស៊ឹម វណ្ណា នោះទេ តើវាមានអាថ៌កំបាំង អ្វីក្នុងការផ្លាស់ប្តូរផ្ទេរមុខតំណែងនេះ ។ ដូចនេះគួរតែ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងកងយោធ ខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស មេត្តាពិនិត្យមើលលើភាពចាត់តាំងនេះ អាចនិងមានភាពមិន ប្រក្រតីនេះផង ។
តាមប្រភពព័ត៌មានបានឱ្យដឹងថា សមាសភាពដែលទៅកាន់មុខតំណែងជាមេប៉េអឹមថ្មី នៅស្រុកសៀមប៉ាងនេះ អាចជាកូនប្រសាររបស់អភិបាលខេត្តស្ទឹងត្រែងផងដែរ ៕
