ខេត្តបាត់ដំបង ៖ ប្រជាពលរដ្ឋ បានបង្ហើបឲ្យ ដឹងថា ឈ្មោះ សឿត សល់ បានរកស៊ីដឹកជញ្ជូនឈើប្រណិត ឡើងដុះស្លែទៅហើយ នៅស្រុកគាស់ក្រឡ ស្រុកបាណន់ និងស្រុកសំឡូត មានមន្ត្រីធំៗធ្វើជា បង្អែកក្រោយខ្នង គ្មានអ្នកណាហ៊ានបង្ក្រាបនោះទេ បើទោះបីជាឈ្មោះ សឿត សល់ ដឹកឈើតាម រទេះ កាត់ក្រុងបាត់ដំបង ទាំងថ្ងៃក៏មិនដែលមាននរណាហ៊ានក្អក ដូចជា ឈ្មោះ សឿត សល់ បានដឹកឈើ តាមសង្កាត់រតនៈ ឆ្ពោះទៅសង្កាត់ ព្រែកព្រះស្តេច យ៉ាងរំភើយ។
ប្រភពបានឲ្យដឹងថា ឈ្មោះ សឿត សល់ ជាឈ្មួញរកស៊ីឈើប្រណិត តាមស្រុកចំនួន៣ គឺស្រុក គាស់ក្រឡ ស្រុកបាណន់ ស្រុកសំឡូត និងក្រុងបាត់ដំបង មិនដែលមានសមត្ថកិច្ចណា ហ៊ានបង្ក្រាបទេ ព្រោះនៅពីក្រាយខ្នង ឈ្មោះ សឿត សល់ មានអ្នកការពារហែរហមច្រើន។សមត្ថកិច្ចនៅតាម ស្រុក ពេលពេលប្រទះឃើញឈ្មោះ សឿត សល់ ដឹកឈើចូលក្នុងខេត្ត មិនដែលហ៊ានក្អកឡើយ។ ពីមុនឈ្មោះ សឿត សល់ ទិញឈើយកមកស្តុកនៅផ្ទះ ក្នុងភូមិស្វាយកង់ ឃុំអន្លង់វិល ស្រុកសង្កែ ក្រោយមកបានទិញឈើ មកស្តុកនៅភូមិជ្រៃកោង សង្កាត់ស្លាកែត ក្រុងបាត់ដំបង។
ពេលអ្នកសារព័ត៌មាន រាយការណ៍ជូន សមត្ថកិច្ចរដ្ឋបាលព្រៃឈើ ឲ្យចុះទៅពិនិត្យហើយយកប្រាក់ មិនឃាត់ឈើទេ តាំងពីពេលនោះ មកដល់ពេលនេះ ឈ្មោះ សឿត សល់ ឡើងកូតរហូត ដោយគ្មានអ្នកណាហ៊ានបង្ក្រាប និងប៉ះពាល់បន្តិចណាឡើយ។
ពាក់ព័ន្ធករណីនេះ អ្នកយកព័ត៌មាន បានធ្វើការទំនាក់ទំនង តាមទូរស័ព្ទជាមួយលោក ម៉ៅលៀប ផេង នាយសង្កាត់ រដ្ឋបាលព្រៃឈើបាត់ដំបង ជាច្រើនខ្សែតែមិនចូល មិនអាចសុំការបំភ្លឺបាន ។ ហើយកាលពីសប្តាហ៍ ដើមខែឧសភា ឆ្នាំ២០១៤ ក្រុមសង្កាត់រដ្ឋបាលព្រៃឈើ បានកាក់ រទេះដឹកគ្រែកែច្នៃ នៅចំណុចមុខវត្តរំដួល សង្កាត់ចំការសំរោង ជំរិតទារប្រាក់ ៣០ម៉ឺនរៀល ក្រោយមកសម្របសម្រួលសល់ ២០ម៉ឺនរៀល ទើបមិនបញ្ជូនទៅសង្កាត់ រដ្ឋបាលព្រៃឈើ ហើយចំណែក ឈើប្រណិត របស់ឈ្មោះ សឿត សល់ ដឹកកាត់ក្រុង ហេតុអ្វីមិនបង្ក្រាប ឬមានរបបប្រចាំខែ៕
