មណ្ឌលគិរី៖ លោកស្នងការដ្ឋាននគរបាលខេត្តមណ្ឌលគិរី សូមធ្វើការបំភ្លឺជូនសាធារណជន មេត្តាជ្រាបថា៖ ចំពោះការចុះផ្សាយព័ត៌មានក្នុងម្ចាស់គណនីហ្វេសប៊ុក ដែលមានឈ្មោះ Visal Prak បានចុះផ្សាយថា «ប័រ ធុរេន និងក្រូចផាសិននាំពីវៀតណាមមកខ្មែរតាមច្រកទ្វារទ្វេភាគីដាក់ដាំក៏គួរអោយព្រួយបារម្មណ៍ដែរ» នេះគឺជាការចុះផ្សាយព័ត៌មានមិនពិត ចុះបំភ្លៃគ្មានមូលដ្ឋានពិតប្រាកដច្បាស់លាស់ និងមានចេតនាបង្កាច់បង្ខូចកិត្តិយស សេចក្តីថ្លៃថ្នូរបស់កងកម្លាំង ស្ថាប័នមានសមត្ថកិច្ច, ស្នងការដ្ឋាននគរបាលខេត្តមណ្ឌលគិរីយើងខ្ញុំ មិនអាចទទួលយកបានទេ និងសូមបដិសេធទាំងស្រុង។
នៅក្នុងអំឡុងពេលមេរោគកូវីដ-១៩(COVID-19) ចូលមកលុកលុយឆ្លងរាតត្បាតក្នុងប្រទេសកម្ពុជាកន្លងមក ស្នងការដ្ឋាននគរបាលខេត្តមណ្ឌលគិរី បានធ្វើការប្រជុំផ្សព្វផ្សាយដល់កងកម្លាំងនគរបាលនៃស្នងការដ្ឋាននគរបាលខេត្តមណ្ឌលគិរី ដែលឈរជើងនៅតាមខ្សែបន្ទាត់ព្រំដែន ជាពិសេសកងកម្លាំងនៅតាមបណ្តាប៉ុស្តិ៍នគរបាលច្រកទ្វារទ្វេភាគី ដែលជាប់ជាមួយប្រទេសវៀតណាម ត្រូវអនុវត្តឲ្យបានម៉ឺងម៉ាត់ និងមានប្រសិទ្ធភាពតាមបទបញ្ជារបស់ថ្នាក់ដឹកនាំ ដោយមិនអនុញ្ញាតឲ្យប្រជាពលរដ្ឋកម្ពុជា និងប្រជាពលរដ្ឋវៀតណាមឆ្លងកាត់ចេញចូលតាមព្រំដែននោះទេ ដើម្បីបង្ការ ទប់ស្កាត់ការឆ្លងរាតត្បាតមេរោគកូវីដ-១៩, ចំពោះការផ្លាស់ប្ដូរទំនិញទៅវិញទៅមក ខាងកម្ពុជាបានយកមធ្យោបាយដូចជា ម៉ូតូ ទៅសាងទំនិញនៅចំណុចសូន្យ នៃព្រំដែន ដោយមិនអនុញ្ញាតឲ្យរថយន្តវៀតណាមចូលមកនោះទេ, ចំពោះទំនិញទាំងនោះមានដូចជា៖ បន្លែ ផ្លែឈើបន្តិចបន្តួច ដឹកជញ្ជូនជាលក្ខណៈប្រជាពលរដ្ឋរស់នៅជាប់ព្រំដែនរវាងស្រុក និងស្រុក ដោយដឹកជញ្ជូនជាលក្ខណៈម៉ូតូ ពុំមានដឹកជញ្ជូនជាលក្ខណៈរថយន្តធំៗដូចដែលម្ចាស់គណនីហ្វេសប៊ុក Visal Prak បានធ្វើការចុះផ្សាយនោះទេ។ រាល់ទំនិញទាំងឡាយដែលចូលមកនោះ ខាងសមត្ថកិច្ចដែលឈរជើងនៅតាមច្រកទ្វារទ្វេភាគី បានធ្វើការត្រួតពិនិត្យរួចរាល់ហើយទើបបានអនុញ្ញាតឲ្យចូល។
ចំពោះរូបភាពនៅក្នុងម្ចាស់គណនីហ្វេសប៊ុកឈ្មោះ Visal Prak នោះ ដែលបានចុះផ្សាយថាមានការដឹកជញ្ជូនដូចជារថយន្តសាំយ៉ុងជាច្រើនគ្រឿងហូរហែរ គឺពុំធ្លាប់មាននោះទេ ចំណែកឯរូបភាពសមត្ថកិច្ចឈរជើងត្រួតពិនិត្យនោះ ពុំមែនជាសមត្ថកិច្ចឈរជើងនៅប៉ុស្តិ៍នគរបាលច្រកទ្វារទ្វេភាគីដាក់ដាំ នៃស្នងការដ្ឋាននគរបាលខេត្តមណ្ឌលគិរីយើងខ្ញុំនោះទេ។
ចំពោះការចុះផ្សាយខាងលើនេះ មានការចែករំលែកបន្ត(Share)គ្នា ដែលនាំឲ្យម្ចាស់គណនីហ្វេសប៊ុកដែលមានឈ្មោះ Visal Prak និងសាធារណជនមានការភាន់ច្រឡំ។
ក្នុងនាមថ្នាក់ដឹកនាំស្នងការដ្ឋាននគរបាលខេត្តមណ្ឌលគិរី សូមលើកទឹកចិត្តមហាជន ក្នុងករណីដែលមន្ត្រី នគរបាលបំពេញភារកិច្ចមានការខ្វះចន្លោះ ឬមានការគំរាមកំហែងដល់ប្រជាពលរដ្ឋ ឬសមត្ថកិច្ចផ្សេងៗ សូមរាយការណ៍ ឬដាក់ពាក្យបណ្តឹងមកស្នងការដ្ឋាននគរបាលខេត្តមណ្ឌលគីរី ដើម្បីចាត់ការអប់រំណែនាំ ឬដាក់វិន័យរដ្ឋបាលតាមទោសកំហុស និងអាចឈានដល់ការអនុវត្តច្បាប់។ ក្នុងនាមមន្ត្រីអនុវត្តច្បាប់នឹងខិតខំបម្រើប្រជាពលរដ្ឋអោយអស់ពីលទ្ធភាព បញ្ញាស្មារតី និងសូមទទួលយកការរិះគន់ទាំងឡាយក្នុងន័យស្ថាបនា ។
អាស្រ័យដូចបានបំភ្លឺនិងបញ្ជាក់ជូនខាងលើ សូមសាធារណជន មេត្តាជ្រាបជាព័ត៌មាន ។
