ខេត្តមណ្ឌលគិរី :នាព្រឹកថ្ងៃទី១១ ខែមិថុនា ឆ្នាំ២០២០នេះ លោក សាយ ម៉េងគីម អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជាខេត្តមណ្ឌលគីរី បានដឹកនាំសហការី អញ្ជើញចុះសួរសុខទុក្ខ ព្រមទាំងនាំយកនូវអំណោយមនុស្សធម៌ របស់សាខាកាកបាទក្រហមកម្ពុជាខេត្តមណ្ឌលគិរី ផ្តល់ជូនដល់ប្រជាពលរដ្ឋទីទ័លក្រ ចាស់ជរា ជនពិកា និងស្រ្តីម៉េម៉ាយ ចំនួន៦៨គ្រួសារ នៅឃុំសុខសាន្ត និងឃុំអរបួនលើ ស្ថិតនៅក្នុងស្រុកកោះញែក ខេត្តមណ្ឌលគិរី។ អំណោយដែលផ្តល់ជូននាពេលនោះក្នុងមួយគ្រួសារៗទទួលបាន៖ អង្ករចំនួន ២៥គីឡូក្រាម ត្រីខចំនួន ១យួរ អាវយឺតចំនួន ១ សាប៊ូលាងដៃចំនួន ១ដុំ និងម៉ាសមួយចំនួន។ ដោយឡែក ជនពិការចំនួន ០៣នាក់ ក្នុងមួយម្នាក់ៗ ទទួលបានកង់រទេះរុញ ព្រមទាំងថវិកាមួយចំនួនផងដែរ៕
