ខេត្តមណ្ឌលគិរី: នាព្រឹកថ្ងៃទី០៩ ខែមិថុនា ឆ្នាំ២០២០នេះ លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានអញ្ជើញជួបប្រជុំជាមួយ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្ត នៅសាលាប្រជុំអាគារA របស់រដ្ឋបាលខេត្តមណ្ឌលគិរី ។
ក្នុងឱកាសដែលប្រតិភូអញ្ជើញចុះបំពេញបេសកកម្មទស្សនកិច្ចសិក្សាស្វែងយល់ពីការងារបង្ការ និងទប់ស្កាត់ជំងឺកូវីដ-១៩នៅខេត្តមណ្ឌលគិរី និងជំរុញទប់ស្កាត់ការចម្លងលើកទី២ ព្រមទាំងពិភាក្សាការងារលើកកម្ពស់ការផ្តល់សេវាសុខាភិបាលឲ្យបានដល់ពលរដ្ឋនៅទីជនបទទទួលបានសេវាសាធារណៈរបស់រដ្ឋ និងការបង្ការជំងឺគ្រុនឈាម និងគ្រុនចាញ់នៅក្នុងខេត្ត។
ជោគជ័យក្នុងការងារទប់ស្កាត់កូវីដ-១៩កន្លងមក ដោយសារយើងមានថ្នាក់ដឹកនាំល្អប្រកបដោយយុទ្ធសាស្ត្រ ដាក់ចេញនូវវិធានការឆ្លើយតបទៅនឹងសភាពការណ៍ជាក់ស្តែង របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានគិតគូរខ្ពស់ឆ្លើយតបទៅនឹងស្ថានភាព។ ទន្ទឹមនឹងនេះក៏មានការចូលរួមពីថ្នាក់ដឹកនាំ មន្ត្រីរាជការ និងប្រជាពលរដ្ឋគ្រប់មជ្ឈដ្ឋាន មានស្មារតីប្រុងប្រយ័ត្នខ្ពស់។
