ខេត្តមណ្ឌលគិរី ៖ នាព្រឹកថ្ងៃព្រហស្បតិ៍ ៧កើត ខែជេស្ឋ ឆ្នាំជូត ទោស័ក ព.ស២៥៦៤ ត្រូងនឹងថ្ងៃទី២៨ ខែឧសភា ឆ្នាំ២០២០ ឯកឧត្តមឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី បាន ដឹកនាំកិច្ចប្រជុំពិភាក្សា ស្តីពីវគ្គបំប៉នជំនាញការកសាងផែនការសកម្មភាពឆ្នាំ២០២០ របស់ស្នងការដ្ឋាននគរបាលខេត្តមណ្ឌលគិរី និងផ្សព្វផ្សាយផែនការយុទ្ធសាស្ត្រនគរបាលជាតិ រយៈពេល០៥ឆ្នាំ(២០១៩-២០២៣) របស់អគ្គស្នងការដ្ឋាននគរបាលជាតិ ដើម្បីជាជំនួយ និងមានមូលដ្ឋានក្នុងការកសាងផែនការសកម្មភាពប្រចាំឆ្នាំតាមបណ្តាអង្គភាព ក៏ដូចជាការិយាល័យជំនាញ ចំណុះស្នងការដ្ឋាននគរបាលខេត្ត, ដែលពិធីនេះប្រព្រឹត្តទៅនៅ សាលប្រជុំស្នងការដ្ឋាននគរបាលខេត្ត មានរយៈពេលពេញមួយថ្ងៃ។ ដោយមានការអញ្ជើញចូលរួមពី លោក លោកស្រី ជាស្នងការរង លោក លោកស្រី នាយការិយាល័យជំនាញ លោកអធិការ អធិការរងនគរបាលក្រុងស្រុកទាំងប្រាំ និងលោកមេបញ្ជាការ មេបញ្ជាការរង វរសេនាតូចនគរបាលការពារព្រំដែនគោកទាំងពីរ សរុបអ្នកចូលរួមចំនួន ៦៥នាក់។
លោកឧត្តមសេនីយ៍ស្នងការ បានមានប្រសាសន៍ បើកវគ្គផ្សព្វផ្សាយការកសាងផែនការសកម្មភាព របស់ស្នងការដ្ឋាននគរបាលខេត្ត និងបានផ្តាំផ្ញើដល់ អស់លោក លោកស្រី ជាស្នងការរង នាយការិយាល័យជំនាញ អធិការនគរបាលក្រុង-ស្រុកទាំងប្រាំ និង មេបញ្ជាការវរសេនាតូចនគរបាលការពារព្រំដែនគោកទាំងពីរ ត្រូវយកចិត្តទុកដាក់ស្តាប់តាមកាពន្យល់ណែនាំរបស់គ្រូឧទ្ទេស ដើម្បីមានមូលដ្ឋានក្នុងការកសាងផែនការសកម្មភាព និងអភិវឌ្ឍជំនាញរបស់ខ្លួនឲ្យកាន់តែមានប្រសិទ្ធភាពបន្ថែមទៀត ស្របតាមផែនការយុទ្ធសាស្ត្ររបស់អគ្គស្នងការដ្ឋាននគរបាលជាតិ ដែលបានដាក់ចេញ។
បន្ទាប់ពីបានបើកវគ្គពិភាក្សាផ្លាស់ប្តូរផែនការ សកម្មភាពអស់រយៈពេលពេញ០១ថ្ងៃមក លោកឧត្តមសេនីយ៍ ស្នងការនគរបាលខេត្ត បានមានប្រសាសន៍ណែនាំបន្ថែម និងបានផ្តាំផ្ញើដល់អស់លោក លោកស្រី ជាស្នងការរង នាយការិយាល័យជំនាញ អធិការនគរបាលក្រុងស្រុកទាំងប្រាំ និង មេបញ្ជាការវរសេនាតូចនគរបាលការពារព្រំដែនគោកទាំងពីរ ត្រូវយកផែនការសកម្មភាពឆ្នាំ២០២០ របស់ស្នងការដ្ឋាននគរបាលខេត្ត ដែលបានធ្វើរួចកន្លងមក ទៅធ្វើការកែសម្រួលចណុចខ្វះខាត និងអនុវត្តអោយចំគោលដៅ និងមានប្រសិទ្ធភាពខ្ពស់ ដើម្បីយកមកធ្វើការបូកសរុបចេញជាផែនការសកម្មភាពរួមរបស់ស្នងការដ្ឋាននគរបាលខេត្ត ផ្ញើជូនអគ្គស្នងការដ្ឋាននគរបាលជាតិអោយបានទាន់ពេលវេលា។
ពិធីបិទវគ្គបញ្ចប់នៅវេលាម៉ោង៤:០០នាទីល្ងាច ថ្ងៃដដែល ប្រកបដោយបរិយាកាសរីករាយ និងស្និទ្ធស្នាលបំផុត៕
