ខេតត្បូងឃ្មុំ ៖ ប្រជាពលរដ្ឋនៅក្នុងស្រុកបានឲ្យដឹងថា ស្ថិតនៅចំណុចចំការចំបុី ក្នុងភូមិទួលទ្រា ឃំុជប់ ស្រុកត្បូងឃ្មុំ ខេត្តត្បូងឃ្មុំ កំពុងបើកលេងល្បែងបញ្ជល់មាន់ និងបៀអាប៉ោងទ្រង់ទ្រាយធំយ៉ាងពេញបន្ទុក ព្រោះ លោក សួស ស៊ាងលីអធិការនគរបាលស្រុកត្បូងឃ្មុំ មន្ត្រីអាជ្ញាធរថ្នាក់ឃុំ ថ្នាក់ស្រុកមិនចាត់វិធានការបង្ក្រាបប្រកបដោយប្រសិទ្ធភាពដើម្បីពង្រឹងសន្តិសុខសង្គមនោះទេ។ សូម្បីតែលោកឧត្តមសេនីយ៍ទោ បែន រ័ត្ន ស្នងការនគរបាលខេត្តត្បូងឃ្មុំ និងលោក ជាម ច័ន្ទសោភ័ណ អភិបាលខេត្តត្បូងឃ្មុំ ក៏មិនខ្វល់ពីរឿងចាត់វិធានការបង្ក្រាបល្បែងស៊ីសងខុសច្បាប់ដែលកើតឡើងយ៉ាងអនាធិបតេយ្យនោះទេ។
ប្រការនេះហើយទើបប្រជាពលរដ្ឋក្នុងស្រុកត្បូងឃ្មុំ ខេត្តត្បូងឃ្មុំ អំពាវនាវឲ្យថ្នាក់ដឹកនាំក្រសួងមហាផ្ទៃ និងនាយឧត្តមសេនីយ៍ នេត សាវឿន អគ្គស្នងការនគរបាលជាតិ ចាត់វិធានការបង្ក្រាបល្បែងស៊ីសងក្នុងស្រុកត្បូងឃ្មុំ ជាបន្ទាន់។
ប្រភពពីប្រជាពលរដ្ឋក្នុងភូមិទួលទ្រា ឃំុជប់ ស្រុកត្បូងឃ្មុំ ខេត្តត្បូងឃ្មុំ បានឲ្យដឹងថា ស្ថិតនៅចំណុចចំការចំបុី ភូមិទួលទ្រា អ្នកមានអំណាចដូចជា/1ឈ្មោះយាប /2និងឈ្មោះទ្រី 3/ឈ្មោះធា បើកសង្វៀនបញ្ជល់មាន់និងវង់បៀអាប៉ោងទ្រង់ទ្រាយយ៉ាងរលូន ព្រោះគ្មានមន្ត្រីអាជ្ញាធរឬសមត្ថកិច្ចណាចាត់វិធានការបង្ក្រាបឡើយ។
ប្រជាពលរដ្ឋក្នុងភូមិទួលទ្រា ឃុំជប់ ស្រុកត្បូងឃ្មុំ ក៏បានឲ្យដឹងដែលថា ក្នុងមូលដ្ឋានពួកគាត់ឈ្មោះ យាប និងឈ្មោះទ្រី និងឈ្មោះ ធា បើកសង្វៀនបញ្ជល់មាន់និងវង់បៀអាប៉ោង យ៉ាងសុខស្រួលដោយសារមានការឃុបឃិតបើកដៃពីសំណាក់មន្ត្រីអាជ្ញាធរនិងសមត្ថកិច្ចមូលដ្ឋាន។ ចំណែកលោក បែន រ័ត្ន ស្នងការនគរបាលខេត្តត្បូងឃ្មុំ និងលោក ជាម ច័ន្ទសោភ័ណ អភិបាលខេត្តត្បូងឃ្មុំ ធ្វើមិនដឹងមិនឮអ្វីទាំងអស់ចំពោះបទបញ្ជារបស់ថ្នាក់ដឹកនាំក្រសួងមហាផ្ទៃនិងអគ្គស្នងការនគរបាលជាតិ ក្នុងការបង្ក្រាបល្បែងស៊ីសងដើម្បីពង្រឹងសន្តិសុខសង្គម។
តាមការកត់សម្គាល់របស់ប្រជាពលរដ្ឋក្នុងភូមិទ្រា ឃុំជប់ ស្រុកត្បូងឃ្មុំ បានឲ្យដឹងថា ចាប់តាំងពីឈ្មោះ យាប និងឈ្មោះ ទ្រី និងឈ្មោះធា បើកសង្វៀនបញ្ជល់មាន់និងវង់បៀអាប៉ោង ក្នុងមូលដ្ឋានពួកគាត់គឺបទល្មើសផ្សេងៗជាពិសេសអំពើចោរកម្មនិងបទល្មើសគ្រឿងញៀនមានការកើនឡើងគួរឲ្យភ័យខ្លាច។
ប្រជាពលរដ្ឋបានលើកឡើងថា ល្បែងស៊ីសងខុសច្បាប់រាលដាលកាន់តែខ្លាំងបន្ទាប់ពីលោក បែន រ័ត្ន ទទួលបានតំណែងជាស្នងការនគរបាលខេត្តត្បូងឃ្មុំ ហើយលោក ជាម ច័ន្ទសោភ័ណ ទទួលបានតំណែងជាអភិបាលខេត្តត្បូងឃ្មុំ រួចមក។
ជាក់ស្តែងបច្ចុប្បន្នល្បែងស៊ីសងខុសច្បាប់កើតឡើងយ៉ាងរាលដាលនៅក្នុងស្រុកត្បូងឃ្មុំ ស្រុកមេមត់ និងស្រុកពញាក្រែក ខេត្តត្បូងឃ្មុំ ហើយលោក បែន រ័ត្ន ស្នងការនគរបាលខេត្តត្បូងឃ្មុំ និងលោក ជាម ច័ន្ទសោភ័ណ អភិបាលខេត្តត្បូងឃ្មុំ មិនចាត់វិធានការបង្ក្រាបនៅឡើយទេ បើទោះបីត្រូវប្រឈមនឹងការរិះគន់យ៉ាងណាក៏ដោយ៕
