កំពង់ស្ពឺ ៖ នាព្រឹកថ្ងៃទី១០ ខែកុម្ភៈ ឆ្នាំ២០២០ នៅសាលប្រជុំស្នងការដ្ឋាន នគរបាលខេត្តកំពង់ស្ពឺ មានកិច្ចប្រជុំ ផ្សព្វផ្សាយផែនការសកម្មភាពការរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក ឆ្នាំ២០២០ លោកឧត្តមសេនីយ៍ទោ សម សាមួន ស្នងការនគរបាលខេត្ត បានណែនាំទៅដល់ការិយាល័យជំនាញ អធិការ ក្រុង ស្រុក ទាំងអស់ត្រូវបន្ដចូលរួមពង្រឹងអនុវត្តច្បាប់ចរាចរណ៍ផ្លូវគោក នៅទូទាំងខេត្តកំពង់ស្ពឺ ដើម្បីកាត់បន្ថយគ្រោះ ថ្នាក់ចរាចរណ៍ នៅឆ្នាំ២០២០។
លោកឧត្តមសេនីយ៍ស្នងការ មានក្ដីសង្ឃឹមថានៅឆ្នាំ២០២០នេះ គ្រោះថ្នាក់ចរាចរណ៍ផ្លូវគោកនៅទូទាំងខេត្ដកំពង់ស្ពឺ នឹងកាត់បន្ថយក្រោយពីការអនុវត្តន៍រឹតបន្ដឹងច្បាប់ចរាចរណ៍។
ដើម្បីកាត់បន្ថយគ្រោះថ្នាក់ចរាចរណ៍ផ្លូវគោក កងកម្លាំងនគរបាលចរាចរណ៍ត្រូវចូលរួម ទប់ស្កាត់ដោយអនុវត្តនូវគោលការណ៍ដូចជា ៖
-ត្រូវពង្រឹងតួនាទីដឹកនាំ អ្នកអនុវត្តរឹតបន្ដឹងច្បាប់ចរាចរណ៍ផ្លូវគោក ។
-ពិនិត្យដោះស្រាយដាក់ចេញវិធានការកែលម្អ សណ្ដាប់ធ្នាប់សាធារណៈ ។
-ចាត់វិធានការគ្រប់គ្រងទ្រូងផ្លូវ និងចញ្ចើមផ្លូវ ។
-ចាត់តាំងផ្សព្វផ្សាយដល់មន្ដ្រីរាជការ និងផ្សព្វផ្សាយដល់ប្រជាពលរដ្ឋឲ្យយល់ដឹងកាន់តែច្បាស់ថែមទៀត ។
-ការិយាល័យជំនាញ ប្រមូលផ្ដុំព័ត៌មានជុំវិញទាក់ទងនិងស្ថានភាព ការអនុវត្តន៍ច្បាប់ចរាចរណ៍ ។
-ដាច់ខាតគ្រប់អង្គភាព ស្ថាប័នរដ្ឋត្រូវអនុវត្តវិន័យច្បាប់ ។
-ត្រូវរៀបចំកិច្ចប្រជុំដកពិសោធន៍ ដេីម្បីស្វែងរកចំណុចខ្វះខាត។
ដើម្បីអនុវត្តទិសដៅការងារសុវត្ថិភាព និងស្មារតីប្រកាសរបស់ គណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) ដែលកំណត់យកឆ្នាំ២០២០ ជាឆ្នាំនៃការរឹតបន្ដឹងអនុវត្តច្បាប់ចរាចរណ៍ផ្លូវគោកឱ្យបានសម្រេចជោគជ័យ និងបានដាក់ចេញនូវផែនការសកម្មភាពការរឹតបន្ដឹងអនុវត្តច្បាប់ចរាចរណ៍ផ្លូវគោកចំនួន ៦ រួមមាន ៖
ទី១-បង្កើនប្រសិទ្ធភាពការអនុវត្តច្បាប់ចរាចរណ៍ផ្លូវគោក សំដៅកាត់បន្ថយជាអតិបរមានូវហេតុការណ៍គ្រោះថ្នាក់ និងជនរងគ្រោះថ្នាក់ចរាចរណ៍។
ទី២-រៀបចំសណ្តាប់ធ្នាប់ចរាចរណ៍ផ្លូវគោក ឲ្យកាន់តែមានភាពល្អប្រសើជាលំដាប់។
ទី៣-លើកកម្ពស់ថែមទៀតនូវស្មារតីចូលរួមគោរពអនុវត្តច្បាប់ស្ដីពីចរាចរណ៍ផ្លូវគោក។
ទី៤-ដាក់ចេញវិធានការជាក់ស្ដែង ដើម្បីពង្រឹងគុណភាព ក្នុងការដោះស្រាយច្បាប់ស្តីពីចរាចរណ៍ផ្លូវគោក។
ទី៥-រៀបចំកម្លាំងមធ្យោបាយ ឧបករណ៍ សម្ភារៈ បច្ចេកទេស បម្រើប្រតិបត្តិការបានគ្រប់គ្រាន់។
និងទី៦-ត្រូវលើកសរសើរលើកទឹកចិត្តចំពោះមន្ដ្រីមានស្នាដៃ និងអនុវត្តវិន័យម៉ឹងម៉ាត់ចំពោះមន្ដ្រីដែលខុសឆ្គង ក្នុងករណីធ្ងន់ធ្ងរ អនុវត្តវិធានការច្បាប់៕