ខេត្តព្រះវិហារ ៖ ការជីក កកាយដី និងហ៊ុំព័ទ្ធដីភ្នំដាក់កុងត្រូលរាំងផ្លូវ ដែលជាដីរបស់រដ្ឋយ៉ាងអនាធិបតេយ្យ ទៅ ធ្វើអាជីវកម្មពីសំណាក់ពួកឈ្មួញ និងជនខិលខូចមួយចំនួន ។ តំបន់ដែលពួកឈ្មួញមានង៉ាជាឧកញ៉ា និងមន្រ្តីរាជ ការ ទាហាន ប៉ូលីសបានហ៊ុំព័ទ្ធដីព្រៃ និងភ្នំស្ថិតនៅចំនុចភ្នំអន្លុងភូមិរំដេង ឃុំរមទម ស្រុករវៀង ខេត្តព្រះវិហារ ជាក់ ស្តែងស្រាប់ដូចមានឧកញ៉ា ហេង និងមានមនុស្សជំនិតម្នាក់ឈ្មោះ បូវិទ្ធ ព្រមទាំងមានកម្មករក្មេងៗពី ៤ ទៅ ១០ នាក់ កំពុងតែចាំដីទាំងនោះ ដែលមានចំនួនជាច្រើនហិកតា ហើយបានបិទផ្លូវមិនឲ្យប្រជាពលរដ្ឋដឹកទំនិញ ឬចរាចរចេញចូលនៅតំបន់នោះឡើយ។
បើតាមការផ្តល់ព័ត៌មានពីប្រជាពលរដ្ឋនៅតំបន់ជិករ៉ែមាសនោះ បានឲ្យដឹងថា ជួនកាលពួកឈ្មួញបាន បង្ហូរជាតិគីមីនិងមេអាស៉ីតមកក្នុងទឹកធ្វើឲ្យប៉ះពាល់ដល់បរិស្ថាន ព្រមទាំងជីវិតមនុស្ស សត្វទៀតផង ។
ពាក់ព័ន្ធនឹងបញ្ហានេះ គេពុំដែលឃើញមានអាជាធរ ឬសមត្ថកិច្ចជំនាញនាមួយអើពើចុះទៅណែនាំ ឬបង្រ្កាបម្តង ណាឡើយដោយសំងំចាំទទួលលាភពីឈ្មួញបន្តិចបន្ទួចតែប៉ុណ្ណោះ ។ លើសពីនេះទៅទៀត ពួកឈ្មួញបានជួល កំលាំង ប៉ូលីសមកយាមការពារ ព្រមទាំងដាក់ប៉ារ៉ាស ប្រៀបដូចកុងត្រូលដែលមិនអនុញ្ញាត ឲ្យប្រជាពលរដ្ឋចូល ទៅបោចវល្លិ៍ កាប់ផ្តៅនៅទីនោះសោះឡើយ ។
ពាក់ព័ន្ធបញ្ហារឿងពួកឈ្មួញហ៊ុំព័ទ្ធភ្នំយកដីព្រៃ ប្រើជាតិគីមី បង្ហូរចូលក្នុងទឹកធ្វើឲ្យប៉ះពាល់ដល់បរិស្ថានធម្មជាតិ និងជីវិតមនុស្សសត្វនេះ អ្នកយកព័ត៌មានយើងបានភ្ជាប់ទូរស័ព្ទទៅលោក គង់ មករា ប្រធានមន្ទីរឧស្សាហកម្មរ៉ែ និងថាមពលខេត្តព្រះវិហារលោកបាននិយាយថា ពាក់ព័ន្ធរឿងបទល្មើសខាងលើ លោកមានការលំបាកណាស់ នៅពេលកំលាំងលោកចុះទៅទាល់តែសុំការចូលរួមសហការពីកំលាំងប្រដាប់អាវុធមានទាហាន ប៉ូលីស នៅពេល ចុះទៅពួកទាំងអស់នោះ បានរត់គេចខ្លួនអស់ហាក់ដូចជាមានផ្ទៃក្នុងចាំផ្តល់ដំណឹងឲ្យឈ្មួញរាល់ៗលើក ៕
