ខេត្តមណ្ឌលគិរី ៖ នាព្រឹកថ្ងៃច័ន្ទ ១កើត ខែកក្ដិក ឆ្នាំ កុរ ឯកស័ក ព.ស ២៥៦៣ ត្រូវនឹងថ្ងៃទី២៨ ខែ តុលា ឆ្នាំ២០១៩ រដ្ឋបាលខេត្តមណ្ឌលគិរីបានរៀបចំកិច្ចប្រជុំត្រួតពិនិត្យការងារប្រចាំខែតុលា ឆ្នាំ ២០១៩ និងទិសដៅអនុវត្តការងារបន្ត ក្រោមវត្តមានឯកឧត្តម ស្វាយ សំអ៊ាង អភិបាល នៃគណៈអភិបាលខេត្តមណ្ឌលគិរី ដោយមានការចូលរួមពី លោកអភិបាលរងខេត្ត ថ្នាក់ដឹកនាំកងកំលាំងប្រដាប់អាវុធទាំងបីប្រភេទ លោក លោកស្រីប្រធាន អនុប្រធានមន្ទីរ អង្គភាព លោក លោកស្រី អភិបាល អភិបាលរង ស្រុក/ក្រុង ដែលបានប្រព្រឹត្តទៅនៅអាគាររដ្ឋបាលខេត្តមណ្ឌលគិរី ។
ឯកឧត្តម ស្វាយ សំអ៊ាង អភិបាលខេត្ត បានមានប្រសាសន៍ថា កិច្ចប្រជុំនេះ ក្នុងគោលបំណងដើម្បីទប់ទល់នៃការបំផ្លាញសុខសន្តិភាព ស្ថិរភាពជាតិ ពីការប៉ុនប៉ងផ្តួលរំលំរាជរដ្ឋាភិបាលស្របច្បាប់ ដែលថ្មីៗនេះ មេដឹកនាំក្រុមប្រឆាំងនៅក្រៅប្រទេសរបស់ ទណ្ឌិត សម រង្ស៊ី និងបក្ខពួក បានប្រកាសអំពីផែនការវិលត្រឡប់ចូលមកកម្ពុជាវិញ នាថ្ងៃទី០៩វិច្ឆិកា ឆ្នាំ២០១៩ ខាងមុខនេះ ដែលជាផែនការបានបង្កប់នូវឧបាយកលដ៏ពិសពុល ប៉ុនប៉ងផ្តួលរំលំរាជរដ្ឋាភិបាលស្របច្បាប់។
ឯកឧត្តមបានបន្តថា ដើម្បីប្រឆាំងនូវរាល់ឧបាយកល និងសកម្មភាពប៉ុនប៉ងផ្តួលរំលំរាជរដ្ឋាភិបាលតាមគ្រប់រូបភាពសំដៅការពាររដ្ឋធម្មនុញ្ញ ការពារស្ថាប័ននានារបស់ជាតិ និងរដ្ឋបាលសាធារណៈ ការគោរពច្បាប់ ដើម្បីថែរក្សាសន្តិភាពសន្តិសុខសណ្ដាប់ធ្នាប់សាធារណៈជូនប្រជាពលរដ្ឋ។ ទន្ទឹមនោះលោក បានស្នើដល់មន្ត្រីរាជការ កងកម្លាំងមានសមត្ថកិច្ចគ្រប់លំដាប់ថ្នាក់ត្រូវយកចិត្តទុកដាក់អនុវត្តតួនាទីភារកិច្ចប្រកបដោយស្មារតីទទួលខុសត្រូវ និងត្រូវចាត់តាំងក្រុមការងារថ្នាក់ជាតិចុះមូលដ្ឋាន ដើម្បីរៀបចំវេទិកាសាធារណៈសំដៅប្រមូល និងដោះស្រាយបញ្ហាប្រឈមនានាក្នុងមូលដ្ឋាន និងផ្សព្វផ្សាយអប់រំប្រជាពលរដ្ឋឲ្យយល់ដឹងអំពីឧបាយកលដ៏ពិសពុល និងគ្រោះថ្នាក់របស់ទណ្ឌិត សម រង្ស៊ី និងបក្ខពួក ដែលប៉ុនប៉ងផ្តួលរំលំរាជរដ្ឋាភិបាលស្របច្បាប់ ត្រូវអនុវត្តគោលនយោបាយភូមិឃុំមានសុវត្ថិភាព ដើម្បីបង្ការ ទប់ស្កាត់ និងបង្ករាប់បទល្មើសនានាក្នុងមូលដ្ឋាន និងត្រូវរួមគ្នាថែរក្សាសុខសន្តិភាពនៅតាមមូលដ្ឋានភូមិឃុំរៀងៗខ្លួន ។
ជាមួយគ្នានោះឯកឧត្តមក៏បានអំពាវនាវដល់ប្រជាជនក្នុងខេត្តទាំងអស់ ត្រូវចូលរួមអបអរសាទរពិធីបុណ្យជាតិនានា ពិសេសចូលរួមហូបអំបុកនាថ្ងៃទី០៩វិច្ឆិកាខាងមុខនេះ អោយបានគ្រប់ៗគ្នា ដើម្បីរួមគ្នាថែរក្សាការពារវប្បធម៌ ប្រពៃណី ទំនៀមទំលាប់ខ្មែរ និង អបអរថ្ងៃបុណ្យឯករាជ្យជាតិ ក្នុងការការពារ ជាតិ សាសនា ព្រះមហាក្សត្រ៕