បាត់ដំបង ៖ លោកអ៊ុត ក្លឹង ប្រធានរដ្ឋាករទឹកខេត្តបាត់ដំបងបានឲ្យដឹងកាលពីថ្ងៃទី២៥ ខែកក្កដា ឆ្នាំ២០១៩កន្លងថ្មីៗនេះថា ដោយសារតម្រូវ នៃការប្រើប្រាស់ទឹកស្អាតរបស់ប្រជាពលរដ្ឋមានការកើនឡើងខ្ពស់ ពីមួយឆ្នាំទៅមួយឆ្នាំ អង្គភាពរដ្ឋាករទឹកខេត្តចាំបាច់ ត្រូវបាននិងកំពុងខ្នះខ្នែងឲ្យទាន់ពេលវេលា ដើម្បីសាងសង់ឡើងនូវរោងចក្រផលិតទឹកស្អាតថ្មីមួយបន្ថែមទៀតទើបអាចឆ្លើយតបនឹងរ៉ាប់រងសេចក្តីត្រូវការដែលកើនឡើងខ្ពស់របស់ប្រជាពលរដ្ឋជាបន្តបន្ទាប់បាន។
បច្ចុប្បន្ន ក្នុងខេត្តបាត់ដំបង កំណើនប្រជាពលរដ្ឋប្រើប្រាស់ទឹកកាន់តែមានការកើនឡើងខ្ពស់ បើទោះបីមានស្ថានីយផលិតទឹកស្អាត ផលិតទឹកក្នុងបរិមាណខ្ពស់២រួចមកហើយក៏ដោយចុះ ក៏មិនបានតាមតម្រូវការ នៃការប្រើប្រាស់របស់ប្រជាពលរដ្ឋនៅឡើយដែរ ដូច្នេះរដ្ឋាករទឹកខេត្តបាត់ដំបង គ្រោងបង្កើតរោងចក្រផលិតទឹកស្អាតថ្មីទី៣បន្ថែមទៀត ដែលមានទំហំទឹកប្រាក់ជាង៣៣លានដុល្លារ ដោយចាប់ផ្តើមឡើងក្នុងឆ្នាំ២០២១ ដើម្បីបំពេញតម្រូវការរបស់ប្រជាពលរដ្ឋក្នុងខេត្តបាត់ដំបងកើនឡើងខ្ពស់ពីមួយឆ្នាំទៅមួយឆ្នាំ។
លោកថា ប្រព័ន្ធចែកចាយទឹកស្អាតអនុវត្តតាមគោលនយោបាយរបស់រាជរដ្ឋាភិបាលកម្ពុជានេះជាគម្រោងពង្រីកបណ្តាញឆ្ពោះទៅកាន់តំបន់ក្រៅទីប្រជុំជនដែលផ្តោតសំខាន់លើការពង្រឹងគុណភាពអនាម័យសុខុមាលភាពទឹកស្អាតតំបន់ជនបទជុំវិញខេត្តបាត់ដំបង។
លោកថា ស្ថានីយធំទី៣ គ្រោងនឹងបង្កើតថ្មីខាងលើនេះ អាចមានសមត្ថភាពផ្គត់ផ្គង់ទឹកស្អាតបានចំនួន៥០០០០ម៉ែត្រគូប នៅក្នុងមួយថ្ងៃតាមផែនការត្រូវគ្របដណ្ដប់ទាំងស្រុងលើឃុំចំនួន៣ គឺក្នុងឃុំអន្លង់វិល ឃុំច្រាបក្រសាំង និងឃុំអូររាគី ខណៈស្ថានីយទី១ និងទី២ ផ្គត់ផ្គង់ទឹកស្អាតលើតំបន់ទីប្រជុំជនក្រុងបានចំនួន៣៣៥២០ម៉ែត្រគូបក្នុងមួយថ្ងៃ។
លោកប្រធានរដ្ឋាករទឹកខេត្តបាត់ដំបងរូបនេះបានបន្តថា គម្រោងសាងសង់រោងចក្រផលិតទឹកស្អាតទី៣នេះដែរ គឺមានទីតាំងឋិតនៅក្នុងភូមិកំពុងសីមាសង្កាត់វត្តគរក្រុងបាត់ដំបងដោយចំណាយថវិកាជាជំនួយប្រាក់កម្ចីរបស់ធនាគារអភិវឌ្ឍន៍អាស៊ីADBក្នុងទំហំសាច់ប្រាក់ចំនួន៣៣លាន៦សែនដុល្លារអាមេរិកសាងសង់លើផ្ទៃដីរបស់អង្គភាពរដ្ឋាករទឹកខេត្តបាត់ដំបងដែលមានផ្ទៃក្រឡាចំនួន១.៥ហិកតាដោយចាប់ផ្តើមដំណើរការសាងសង់នៅក្នុងអំឡុងឆ្នាំ២០២១ឬឆ្នាំ២០២២ខាងមុខនេះ។
លោកក៏បានបញ្ជាក់ដែរថា ដោយសារតែខេត្តបាត់ដំបងមានសក្ដានុពលប្រភពទឹកដ៏ធំ និងរឹងមាំ គឺអាងស្តុកទឹកស្ទឹងសង្កែដែលជាខ្សែទឹកហូរនាំដីល្បាប់មានជីជាតិយ៉ាងល្អអំណោយផលដល់មនុស្សសត្វ និងដំណាំនានា និងបាននាំទឹករាប់លានម៉ែត្រគូបហូរចាក់ពីប្រភពផ្សេងៗគ្នា ពិសេសនាំទឹកពីតំបន់ព្រៃក្រាស់ប៉ែកខាងលើក្នុងស្រុកសំឡូត នៃខេត្តបាត់ដំបង៕
