លោកស្រី អ៊ុង សុជាត្តា នាយិការសាលាបឋមសិក្សា ហ៊ុន សែន អូរច្រារ បានឲ្យដឹងថានៅក្នុង សាលាបឋម សិក្សា ហ៊ុន សែន អូរច្រាមានសិស្សសរុប ចំនួន៣៥១នាក់(ស្រី១៧៤នាក់)មានថ្នាក់រៀន ចំនួន១២ថ្នាក់ចាប់ពី កម្រិតមត្តេយ្យដល់ ថ្នាក់ទី៦ និងបុគ្គលិកចំនួន១៤ នាក់ស្រី១០នាក់ ។ អគារសិក្សាថ្មីដែលជាអំណោយរបស់អង្គការសប្បុរធម៌ជប៉ុន ហ្គោតូហ្វូមីអូ គឺមួយខ្នងមានចំនួន ០៤ បន្ទប់សាងសងអំពីប៉េតុងដោយចាប់ផ្តើមសាងសងនៅថ្ងៃទី០១ ខែកក្កដា ឆ្នាំ២០១៣ហើយបានរួចរាល់ ជាស្ថាពរនៅថ្ងៃ ទី២២ ខែធ្នូ ឆ្នាំ២០១៣ នេះដោយមានបំពាក់ សំភារៈបរិក្ខា សិក្សា ដូចជា តុ កៅអី ក្តាខៀន ដោយចំណាយ ថវិការសរុបអស់ចំនួន ៤៧,៨៩០ដុល្លារសហរដ្ឋអាមេរិក ។
លោក ហ្គោតូ ហ្វូមីអូ ប្រធានអង្គការសប្បុរធម៌ជប៉ុន បាននិយាយថាបើយើងប្រៀបធៀបទៅរឿងមួយថាយើងមានអង្គ ៥០០ បាវយក មកចែកផ្តល់ឲ្យក្មេងៗ គឺអង្ករនោះពិតជាត្រូវយកទៅដាំបានហូបអស់ តែបើយកអង្ករនោះទៅលក់ ហើយយកលុយមកកសាងសាលារៀននោះ គឺវានឹងអាចផ្តល់ជូននូវចំណេះវិទ្យាបានយូរអង្វែង ទើបលោកបាននាំផ្តល់ជាថវិការសាងសង អគារសិក្សានេះឡើង។
លោក កើត សុធា អភិបាលរងខេត្តប៉ៃលិនបានមានប្រសាសន៍ស្វាគមន៍ចំពោះលោក អនុរដ្ឋលេខាធិការក្រសួងអប់រំដែលបាន អញ្ជើញជាគណៈអធិបតី ក្នុងពិធីសម្ភោធដាក់ឲ្យប្រើប្រាស់ជាផ្លូវការ អគារសិក្សាថ្មីនៅក្នុងសាលាបឋមសិក្សា ហ៊ុន សែន អូរច្រាននាពេលនេះ និងបានថ្លែងអំណរគុណចំពោះអង្គការ សប្បុរសធម៌ជប៉ុន ហ្គោតូហ្វូមីអូ ដែលបានចំណាយទាំង ថវិការ សំភារៈ ពេលវេលា និងទឹកចិត្តដ៍សប្បុរសនេះ ដើម្បីជួយបំពេញតំរូវ ការរបស់សាលា ដែលកំពុង ខ្វះខាត។
លោក ហ៊ាង ស៊ីណេ អនុរដ្ឋលេខាធិការក្រសួងអប់រំយុវជន និងកីឡាបានប្រសាន៍ផ្តាំផ្ញើរដល់សិស្សានុសិស្សបន្ទាប់ពីបានអគារ សិក្សាថ្មីនេះ ត្រូវខិតខំរៀនសូត្រ ព្រោះថាចំណេះដឹងគឺជាស្ពានសម្រាប់ឲ្យប្អូនៗឈានទៅទទួលបាន ភាពជោគជ័យក្នុងជិវិតគឺមានន័យ ថាពេលដែលប្អូនៗរៀនចប់ទៅនឹងអាចរកការងារធ្វើបានល្អ និងអាចក្លាយជាថ្នាក់ដឹកនាំក្នុងស្ថាប័នណាមួយ ។
លោកបានសំណូមពរដល់សិក្សានុសិស្ស លោកគ្រូអ្នកគ្រូ និងបងប្អូនប្រជាពលរដ្ឋត្រូវរួមគ្នាថែរក្សា នូវអគារសិក្សានេះឲ្យបាន ល្អ ដើម្បីយើងប្រើប្រាស់បានយូរអង្វែង ៕ សំ កូលីន
