បាត់ដំបង ៖ តូបលក់សាំងមួយកន្លែង ត្រូវរថយន្តពាក់ស្លាកលេខរដ្ឋសភា បុកបណ្តាលឲ្យឆេះផ្អើលទាំងយប់ ហើយស្ត្រីម្ចាស់ តូប រលាក រងរបួសធ្ងន់ ដឹកសង្គ្រោះនៅគ្លីនិកឯកជន ទាំងយប់ កាលពីវេលាម៉ោង ២២ និង ៣០ នាទី យប់ថ្ងៃទី១៨ ខែកុម្ភៈ ឆ្នាំ២០១៤នៅចំណុច មុខក្លិបកំសាន្តស្តាឡាយ ស្ថិតក្នុងភូមិអូរតាគាំ ៣ សង្កាត់ទួលតាឯក ក្រុងបាត់ដំបង ។
សូមបញ្ជាក់ថា កាលពីខែមករា ឆ្នាំ២០១៤ ក្រុមចោរប្លន់ម៉ូតូ បានសម្រេចជិះរត់គេច បានប្រហែល ១០០ ម៉ែត្របុកតូបលក់ សាំង ចំណុចខាងលើនេះ ដួលច្រង៉ាប់ច្រងិល ហើយត្រូវប្រជាពលរដ្ឋចាប់អោយសមត្ថកិច្ចនគរបាល ។ តែវេលាម៉ោង ២២ និង ៣០ នាទីយប់ថ្ងៃទី១៨ខែកុម្ភៈឆ្នាំ២០១៤ រថយន្តបុកតូបសាំងបណ្តាល អោយឆេះ មានការភ្ញាក់ផ្អើល ហើយប្រជាពលរដ្ឋ ជួយ ពន្លត់ទាន់ មិនអោយឆេះដល់ផ្ទះអ្នកដ៏ទៃ ។
តាមប្រភពសាក្សីបានអោយដឹងថា រថយន្តបង្កម៉ាកអ៊ីស៊ុយហ្ស៊ុយ ពណ៌សម្បកឪឡឹកពាក់ស្លាកលេខរដ្ឋសភា 2-035ជាកម្មសិទ្ធិ របស់លោក ទេស ហ៊ាញ អតីតសមាជិក រដ្ឋសភា។ បើកបរដោយឈ្មោះ ម៉ាប់ អាយុ ជាង ២០ ឆ្នាំជាកូនប្រុសលោក ទេស ហ៊ាញ មានទីលំនៅភូមិសង្កាត់ទួលតាឯក ក្រុងបាត់ដំបង ។ ចំណែកស្រ្តីរងគ្រោះ ដែលត្រូវភ្លើងឆេះ មានឈ្មោះ តាំ អេង ហៅវ៉ិត អាយុ៥២ឆ្នាំ មុខរបរលក់ចាប់ហួយ និងសាំងដប រងរបួសពេញដងខ្លួន ដៃ ក ដើមទ្រូង និងសក់ មានទីលំនៅក្នុងភូមិកើតហេតុ ។ សាំងជាច្រើនដប ត្រូវឆេះបំផ្លាញអស់ គិតជាទឹកប្រាក់ជាង ១៥០០ ដុល្លារ ។
សាក្សីបានឲ្យដឹងថា មុនពេលកើតហេតុ កូនប្រុសលោក ទេស ហ៊ាង បានចេញមកពីកន្លែងផឹកស៊ី ហើយមានភាពស្រវឹងជោគ បានបើកបររថយន្តទៅបុកតូបលក់ចាប់ហួយ និងលក់សាំងដប ១ កន្លែង ដែលសង់នៅកាច់ជ្រុង ជាប់ចិញ្ចើមថ្នល់ ពេញមួយទំហឹងបណ្តាល ឲ្យឆាបឆេះជាអណ្តាតភ្លើង ឆេះតូបខ្ទេចអស់គ្មានសល់ និងឆាបឆេះស្ត្រីម្នាក់ដែលជាម្ចាស់តូប បណ្តាលឲ្យរបួសធ្ងន់ ត្រូវបានអ្នកជិតខាងដឹកយកទៅមន្ទីរពេទ្យឯកជនសុវណ្ណជាបន្ទាន់ ។ ក្រោយបង្កហេតុរួច អ្នកបើករថយន្ត បានព្យាយាមបើករត់ចូល ទៅក្នុងផ្ទះរបស់ខ្លួន ។សមត្ថកិច្ច ក្រុមបង្ការ បង្ក្រាប នៃស្នងការដ្ឋាននគរបាលខេត្ត បានបើករថយន្តដេញតាម រហូតទៅដល់ផ្ទះ ស្រាប់តែលោក ទេស ហ៊ាញ ចេញមុខមកអន្តរាគមន៍ មិនឲ្យសមត្ថកិច្ចនាំយករថយន្ត និងកូនប្រុសរបស់លោកទៅការិយាល័យចរាចរណ៍ផ្លូវគោកឡើយ ដោយលោកនិយាយថា រង់ចាំដោះស្រាយនៅថ្ងៃស្អែក ។
នគរបាលចរាចរណ៍ខេត្តបានបញ្ជាក់ថា នៅម៉ោង ៣ រសៀលថ្ងៃទី១៩ ខែកុម្ភៈ ថា ភាគីអ្នកបង្កបានប្រាប់នគរបាលបង្ការបង្ក្រាបថា លោក ទេស ហ៊ាញ ជាអ្នកទទួលខុសត្រូវទាំងអស់ ចំពោះការខូចខាត ទ្រព្យសម្បត្តិ និងថ្លៃព្យាបាលរបស់អ្នកជំងឺ ។ ចំណែកជនរងគ្រោះបានប្រាប់ថា សម្ភារៈលក់ដូរ ដូចជាសាំងនិងចាបហួយ គិតជាប្រាក់ចំនួន១៥០០ដុល្លា ចំណែកជំងឺរបួស មិនទាន់អាចវាយតម្លៃបានទេ ៕
ភារម្យ