មណ្ឌលគិរី ៖ នាថ្ងៃព្រហស្បតិ៍ ១រោច ខែអស្សុជ ឆ្នាំច សំរិទ្ធស័ក ព.ស២៥៦២ ត្រូវនឹងថ្ងៃទី២៥ ខែតុលា ឆ្នាំ២០១៨ ឯកឧត្តម ស្វាយ សំអ៊ាង អភិបាលខេត្ត បានអញ្ជើញជាអធិបតី ក្នុងពិធីបិទវគ្គបំពាក់បំប៉នដល់ភ្នាក់ងារសុខភាពសត្វភូមិ ដែលរៀបចំឡើងដោយការិយាល័យផលិត កម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី ដោយ មានការចូលរួមពីលោកនាយករដ្ឋបាលសាលាខេត្ត លោកប្រធានមន្ទីរ និងកងកម្លាំងប្រដាប់អាវុធទាំងបី នៅសាលប្រជុំមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី ។
ឯកឧត្តម ស្វាយ សំអ៊ាង បានមានប្រសាសន៍ថា «ការចិញ្ចឹមសត្វ មាន់ ទា ជ្រូក គោ ក្របី នៅតាមលំនៅឋានបែបគ្រួសារ គឺបានផ្តល់ផលប្រយោជន៍ជាច្រើនដល់បងប្អូនប្រជាពលរដ្ឋ ទាំងកម្លាំងអូសទាញ នឹងប្រាក់កម្រៃបប្រចាំថ្ងៃសម្រាប់ដោះស្រាយជីវភាព ។
មិនត្រឹមតែប៉ុណ្ណោះ ការចិញ្ចឹមសត្វនៅតាមគ្រួសារក៏ ជាការរួមចំណែកកាត់បន្ថយនូវភាពក្រីក្រ ហើយទទួលបានផលិតផលសាច់សត្វមាន គុណភាពខ្ពស់សម្រាប់បម្រើសេចក្តីត្រូវការប្រចាំថ្ងៃ ក៏ប៉ុន្តែប្រជាពលរដ្ឋ ត្រូវមានការប្រុងប្រយ័ត្នចំពោះសត្វចិញ្ចឹមគ្រប់ប្រភេទ ដែលអាចមានជំងឺឆ្លងដល់មនុស្ស ធ្វើឲ្យខាតបង់ពេលវេលា នឹងប្រាក់កាក់ ប្រសិនបើមិនមានវិធានការណ៍បង្ការទុកជាមុនឲ្យបានត្រឹមត្រូវ ។
យោងតាមរបាយការណ៍ពីមន្ទីរកសិកម្ម រុក្ខាប្រមាញ់ និងនេសាទខេត្តថា «ការចាក់វ៉ាក់សាំង និងអន្តរាគមន៍ព្យាបាល ចាប់ពីដើមឆ្នាំ ២០១៨មក ក្រុមការងារបច្ចេកទេសបានចាក់វ៉ាក់សាំងជ្រូកសរុប ៤,២៦០ក្បាល កើន ១៩៨ក្បាល ក្នុងនោះមានការពារជម្ងឺសារទឹក ១,៥៦៦ក្បាល ជម្ងឺប៉េស្ត ១,៣៤២ក្បាល រាក១,៣៥២ក្បាល ។
លោកប្រធានមន្ទីរកសិកម្មបន្តថា មន្ត្រីបានចាក់វ៉ាក់សាំងមាន់សរុប ៤,៩៧៥ក្បាល ក្នុងនោះ វ៉ាក់សាំងការពារជម្ងឺញូកាស ១,៨៤០ក្បាល អាសន្នរោគ ១,៧២៩ក្បាល អុតមាន់១,៤០៦ក្បាល ។ វ៉ាក់សាំងសារទឹកគោក្របីសរុប ១,៧៨៦ក្បាល ក្នុងនោះ គោចំនួន ១,៤៣៩ក្បាល និងក្របីចំនួន ៣៤៧ក្បាល ។
លោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានឲ្យដឹងនៅថ្ងៃទី២៥ ខែតុលា ឆ្នាំ២០១៨ថា ការបើកវគ្គបំពាក់បំប៉នដល់ភ្នាក់ងារសុខភាពសត្វភូមិមកពីក្រុង/ស្រុកទាំង ៥ ក្នុងខេត្ត មានចំនួន ៤៤ នាក់ ក្នុងគោលបំណង ដើម្បីស្វែងរកបញ្ហាប្រឈមរបស់ភ្នាក់ងារពេទ្យសត្វភូមិ ដែលជួបប្រទះនៅមូលដ្ឋានជាក់ស្តែង ជាពិសេសការប្រើប្រាស់ថ្នាំ និងវិធីសាស្រ្ត នៃអន្តរាគមន៍ដល់សត្វគ្រប់ប្រភេទនៅក្នុងមូលដ្ឋាន នឹងបានផ្តល់សម្ភារៈរួមនឹងថ្នាំចំនួន ១១មុខ ជូនដល់ភ្នាក់ងារសុខភាពសត្វភូមិ សម្រាប់ព្យាបាលសត្វចិញ្ចឹមតាមផ្ទះផងដែរ ។
ឯកឧត្តម អភិបាលខេត្តបន្តថា សម្រាប់ភ្នាក់ងារសុខភាពសត្វភូមិ ដែលត្រូវបានមន្រ្តីបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្ត បើកវគ្គបំពាក់បំប៉ននេះ នឹងទទួលបាននូវចំណេះដឹងថ្មីៗបន្ថែមទៀត លើការងារថែទាំសត្វចិញ្ចឹម ជៀសវាងមានសត្វឈឺ ហើយមិនដឹងពីវិធីព្យាបាល ។
ឯកឧត្តម បន្ថែមថា បើមានសត្វណាមួយកើតជំងឺប្លែកៗ មិនដឹងពីមូលហេតុ ត្រូវទំនាក់ទំនងសាកសួរមន្រ្តីជំនាញបសុព្យាបាល ដើម្បីរកវិធីបង្ការទប់ស្តាត់រាលដាលជំងឺទៅសត្វដទៃទៀត ។
ដោយឡែក ចំពោះសត្វឈឺមានចំនួនសរុប ១,៩៦៥ក្បាល ក្របី ៣៥១ក្បាល ក្នុងនោះទទួលបានការព្យាបាលចំនួន ១,៥៩៥ ក្បាល ក្របី ៣៤៥ក្បាល ។ មានសត្វងាប់ ដោយមិនបានព្យាបាលសរុប ៨៣ ក្បាល និងក្របី ២៩ ក្បាលផងដែរ ៕