ខេត្តព្រះសីហនុ ៖ រដ្ឋបាលខេត្តព្រះសីហនុ ចេញសេចក្តីប្រកាសព័ត៌មានខ្លឹមសារថា ពិតជាបានបែងចែកដីគោលនយោបាយជូនពលរដ្ឋ ទាំងឡាយណាដែលជាប់ពាក់ពន្ធ័នឹងការកាន់កាប់អាស្រ័យផលជាក់ស្តែងនៅតំបន់ក្បាលឆាយ កាលថ្ងៃទី២០ ខែកញ្ញា ឆ្នាំ២០១៨ កន្លងទៅនេះ ។
ការចេញសេចក្តីប្រកាសព័ត៌មាននេះត្រូវបានធ្វើឡើងបន្ទាប់ពីមានបណ្តាញសារព័ត៌មានក្នុងស្រុកខ្លះ បានចុះផ្សាយមានខ្លឹមសារថា ” ឯកឧត្តម យន្ត មីន បានចែកដីឲ្យអ្នកកាសែត ដើម្បីជាថ្នូរមិនចុះផ្សាយរឿងអាស្រូវ ឬបិទមាត់” ដែលការចុះផ្សាយបែបនេះមិនត្រឹមត្រូវទេ ព្រោះការបែងចែកនេះ គឺសុទ្ធតែជាប្រជាពលរដ្ឋរស់នៅទីនេះជាក់ស្តែង ដោយមិនប្រកាន់បក្ខពួក រើសអើងថាជាប្រជាពលរដ្ឋធម្មតា ឬគ្រួសារ មន្ត្រីរាជការ កងកម្លាំងប្រដាប់អាវុធ និងគ្រួសារអ្នកសារព័ត៌មាននោះឡើយ។
ជុំវិញបញ្ហានេះ រដ្ឋបាលខេត្តព្រះសីហនុ សូមធ្វើការបំភ្លឺថា៖រដ្ឋបាលខេត្តព្រះសីហនុ ពិតជាបានផ្តល់ ចំណែកដីគោលនយោបាយមានទំហំ ៥ម x ២០ម ជូនប្រជាពលរដ្ឋទាំងឡាយ ដែលមានការជាប់ពាក់ ពន្ធ័នឹងការកាន់កាប់អាស្រ័យផលជាក់ស្តែង នៅតំបន់ក្បាលឆាយដោយមិនបានបែងចែកថា អ្នកនោះ ជាពលរដ្ឋ ឬអ្នកសារព័ត៌មាននោះឡើយ។ ក្នុងចំណោមអ្នកដែលបានទទួលគោលនយោបាយទាំងនោះក៏មានក្រុមគ្រួសារអ្នកសារព័ត៌មានខ្លះនៅខេត្តព្រះសីហនុ ដែលបានកាន់កាប់អាស្រ័យផលជាក់ស្តែង នៅតំបន់ក្បាលឆាយនេះដែរ។
សូមបញ្ជាក់ថាការផ្តល់ដីគោលនយោបាយនោះគិតមកដល់ពេលនេះ ដីប្រមាណ១០០០ក្បាល ដីហើយត្រូវបានផ្តល់ជូនប្រជាពលរដ្ឋចំនួន ១០០០គ្រួសារដែរ តាមរយៈដាក់ឲ្យចាប់ឆ្នោតយកលេខសំគាល់ក្បាលដី ដែលបានរៀបចំដោយរដ្ឋបាលខេត្តព្រះសីហនុ ក្នុង អាណត្ថិ ឯកឧត្តម យន្ត មីន ដែលបានសម្រេចផ្តល់ដីឲ្យប្រជាពលរដ្ឋក្រីក្រកំពុងខ្វះខាតទីជម្រកដើម្បីសាងសង់លំនៅដ្ឋានសម្រាប់រស់នៅតាមការប្រមូលផ្តុំរបស់ពួកគាត់ដោយស្របច្បាប់ និងទប់ស្កាត់ការចូលទៅទន្ទ្រានកាន់កាប់យ៉ាងអនាធិបតេយ្យ ។ ដោយចាន់ឡុង
