មណ្ឌលគិរីៈ នាព្រឹកថ្ងៃទី ១៧ ខែ កញ្ញា ឆ្នាំ ២០១៨ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្ត និងអាជ្ញាធរ ក្រុងស្រុក បានសហការគ្នាប្រារព្ធពិធីដាំកូនឈើ ដែលជាប្រភេទឈើបេ ចំនួន ៣០០ដើម ជាការឧបត្ថម្ភរបស់ក្រុមហ៊ុន រេស៊ីតង់ ដែលជាក្រុមហ៊ុន ធ្វើការរុករករ៉ែមាសនៅតំបន់អូខ្វាវ ភូមិចុងផ្លាស់ ស្រុកកែវសីមា ។
កូនឈើចំនួន៣០០ដើម ជាប្រភេទឈើបេ ត្រូវបានដាំតាមដងផ្លូវជាតិលេខ ៧៦ ដែលជាការឧបត្ថម្ភរបស់ក្រុមហ៊ុន រេស៊ីតង់ ជាក្រុមហ៊ុនរុករករ៉ែមាស ក្នុងពិធីដាំកូនឈើ ក្រោមអធិបតីយភាព ឯកឧត្តម ស្វាយ សំអ៊ាង អភិបាលខេត្ត និង មានការចូលរួមពីគ្រប់មន្ទីរអង្គភាពជុំវិញខេត្ត កងកម្លាំងទាំងបី ប្រជាពលរដ្ឋ និងសិស្សានុសិស្សប្រមាណជាង ២០០នាក់ នៅតាមដងផ្លូវជាតិលេខ ៧៦ ក្នុងក្រុងសែនមនោរម្យ ខេត្តមណ្ឌលគិរី ។
ឯកឧត្តម មានប្រសាសន៍ឲ្យដឹងទៀតថា ក្រុមហ៊ុន រេស៊ីតង់ ជាក្រុមហ៊ុនមួយ ដែលបានធ្វើការវិនិយោគ លើធនធានរ៉ែ និងបានសិក្សាអំពីប្រភពរ៉ែមាសច្បាស់លាស់ ចាប់តាំងពីឆ្នាំ ២០១១ រហូតមកដល់បច្ចុប្បន្ននេះ ដោយអនុវត្តទៅតាមការងារបទដ្ឋានគតិយុទ្ធពិតប្រាកដ ត្រឹមត្រូវ ហើយរហូតដល់ឆ្នាំ ២០១៨នេះ ក្រុមហ៊ុន បានទទួលអាជ្ញាប័ណ្ណពីរាជរដ្ឋាភិបាល ក៏ដូចជាក្រសួងរ៉ែ និង ថាមពល ដើម្បីបន្តស្វែងរកអាជីវកម្មរ៉ែមាស នៅតំបន់អូខ្វាវ ភូមិចុងផ្លាស់បន្តទៀត ។
ឯកឧត្តម បានបន្ថែមថា រាជរដ្ឋាភិបាលបានរៀបចំ នូវគោលនយោបាយមួយ ដើម្បីរួមចំណែកផ្សារភ្ជាប់ជាមួយមូលដ្ឋាន ដែលតម្រូវឲ្យក្រុមហ៊ុននីមួយៗ ក្រោយពីទទួលបានសិទ្ធវិនិយោគ នៅមូលដ្ឋានណាមួយ ត្រូវតែរួមចំណែកជួយ បំរើផលប្រយោជន៍នៅមូលដ្ឋាននោះ តួយ៉ាងដូចជា ក្រុមហ៊ុន រេស៊ីតង់ ដែលក្រុមហ៊ុនរុករករ៉ែនៅតំបន់អូខ្វាវ បានរួមចំណែកជាមួយអាជ្ញាធរ និង រដ្ឋាភិបាលជាបន្តបន្ទាប់នៅក្នុងមូលដ្ឋានរបស់ខ្លួន ។
ឯកឧត្តម បានមានប្រសាសន៍ទៀតថា កន្លងមកក្រុមហ៊ុនរុករករ៉ែមាសមួយនេះ បានចូលរួមចំណែក ជាមួយវិស័យអប់រំ ដោយបានជួយសាងសង់ សាលារៀននៅឃុំស្រែឈូក និងភូមិចុងផ្លាស់ រួមទាំងចូលរួមចំណែក ជាមួយវិស័យសុខាភិបាលទៀតផង ។ ជាមួយគ្នានេះ ក្រុមហ៊ុន មានគម្រោងផែនការជាមួយអាជ្ញាធរមូលដ្ឋាន ទាក់ទងហេដ្ឋារចនាសម្ព័ន្ធ ដោយគ្រោងធ្វើការសាងសង់ ស្ថាបនាផ្លូវពីក្រុងសែនមនោរម្យទៅតំបន់ចុងផ្លាស់ ។
ឯកឧត្តម បានបន្ថែថា ផ្លូវមួយនេះជាផ្លូវមួយដ៏លំបាក ដោយសារកញ្ចប់ថវិការដ្ឋ នៅមានកម្រិត ដូចនេះអជ្ញាធរ មិនអាចធានានូវនិរន្ត៍ភាព សម្រាប់ប្រជាពលរដ្ឋ ធ្វើដំណើរបាននៅឡើយ តែអ្វីដែលជាការគិតគូររបស់រាជដ្ឋាភិបាល បានខិតខំគៀងគង រកជំនួយ ជាពិសេសបានសំណូមពរ ដល់ក្រុមហ៊ុនរុករករ៉ែមួយនេះ ជួយសាង់សង់ផ្លូវពីក្រុងសែនមនោរម្យ ទៅដល់ឃុំមេម៉ង់ និង បន្តពីឃុំមេម៉ង់ ទៅតំបន់អូខ្វាវទៀត ដើម្បីផ្តល់ភាពងាយស្រួល ដល់ប្រជាពលរដ្ឋក្នុងការធ្វើដំណើរ ឆ្លងការទៅមកផងដែរ ៕
