ខេត្តមណ្ឌលគិរី : នៅបញ្ជាការដ្ឋានកងទ័ពការពារព្រំដែនខេត្តដាក់ណុង នៃសាធារណរដ្ឋសង្គមនិយម វៀតណាម បានរៀបចំកិច្ចប្រជុំបូកសរុបលទ្ធល កិច្ចសហប្រតិបត្តិការបង្ការ ទប់ស្កាត់ និងបង្ក្រាបបទល្មើសនៅតាមតំបន់ព្រំដែនប្រចាំឆ្នាំ២០១៧ និងលើកទិសដៅកិច្ចសហប្រតិបត្តិការឆ្នាំ២០១៨ រវាងស្នងការដ្ឋាននគរបាលខេត្តមណ្ឌលគិរី (កម្ពុជា) ជាមួយបញ្ជាការដ្ឋានកងទ័ពការពារព្រំដែនខេត្តដាក់ណុង(រៀតណាម) កាលពីព្រឹកថ្ងៃច័ន្ទ ៨រោច ខែស្រាពណ៍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៣ ខែកញ្ញា ឆ្នាំ២០១៨ ។
ភាគីកម្ពុជា ដឹកនាំដោយ ឯកឧត្តម ឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ជាប្រធានប្រតិភូ រួមជាមួយបណ្តាសមាជិកចំនួន ២៣រូប។
ភាគីវៀតណាម ដឹកនាំដោយលោក វរសេនីយ៍ឯក ង្វៀង វ៉ាន់លឺ មេបញ្ជាការកងទ័ពការពារព្រំដែនខេត្តដាក់ណុង ជាប្រធានប្រតិភូ រួមជាមួយបណ្តាសមាជិកចំនួន ២១រូប។
នៅក្នុងកិច្ចប្រជុំនេះដែរ ភាគីទាំងពីរ បានឯក ភាព និងវាយតម្លៃខ្ពស់ចំពោះលទ្ធផលដែលសម្រេចបាននាពេលកន្លងមក និងបញ្ហាដែលនៅសេសសល់មួយចំនួននៃកិច្ចសហប្រតិបត្តិការបង្ការ ទប់ស្កាត់ និងបង្ក្រាបបទល្មើសរវាងភាគីទាំងពីរ ក្នុងរយៈពេលមួយឆ្នាំកន្លងទៅនេះ។
ក្នុងគោលបំណងបង្កើនចំណងសាមគ្គីភាព មិត្តភាព សហប្រតិបត្តិការល្អក្នុងការបង្ការ ទប់ស្កាត់ និងប្រយុទ្ធប្រឆាំងបទល្មើសគ្រប់ ប្រភេទ ដើម្បីធានាសន្តិសុខ សណ្តាប់ធ្នាប់តាមតំបន់ព្រំដែនរវាងខេត្តទាំងពីរ(មណ្ឌលគិរី-ដាក់ណុង) ភាគីទាំងពីរបានឯកភាពអនុវត្តយ៉ាងម៉ឺងម៉ាត់ កំណត់ហេតុធ្វើការ រវាងគណៈប្រតិភូអគ្គស្នងការដ្ឋាននគរបាលជាតិ ក្រសួងមហាផ្ទៃ នៃព្រះរាជាណាចក្រកម្ពុជា និងបញ្ជាការដ្ឋានកងទ័ពការពារព្រំដែន ក្រសួងការពារជាតិ នៃសាធារណរដ្ឋសង្គមនិយមវៀតណាម ដែល បានចុះហត្ថលេខាកាលពីថ្ងៃទី២៨ ខែវិច្ឆិកា ឆ្នាំ២០១៧ នៅរាជធានីភ្នំពេញ នៃព្រះរាជាណាចក្រកម្ពុជា និងបន្តអនុវត្តខ្លឹមសារ នៃកិច្ចសហប្រតិបត្តិការលើកំណត់ហេតុក្នុងកិច្ចប្រជុំថ្ងៃនេះ ។
កិច្ចប្រជុំបានបញ្ចប់ទៅក្រោមបរិយាកាសសប្បាយរីករាយ និងស្និទ្ធស្នាលបំផុត ៕ដោយ ចាន់ឡុង
