កំពង់ចាម ៖ ករណីឃាតកម្ម ដុតសម្លាប់ជនរងគ្រោះ ដែលជាមន្ដ្រី ធនាគារជាតិ ខេត្ដកំពង់ចាម ដើម្បីប្លន់យកខ្សែកមួយខ្សែ ដែល បានបង្កឱ្យមានការភ្ញាក់ផ្អើលនោះ ឥឡូវកម្លាំងនគរបាល ខេត្ដកំពង់ចាម បានធ្វើការចាប់ខ្លួនជនបង្កហើយ ដែលជន សង្ស័យ មានតួនាទីជាអនុ ប្រធានការិយាល័យគណនេយ្យ នៃស្នងការ ដ្ឋាននគរបាល ខេត្ដកំពង់ចាម ។
នគរបាលព្រហ្មទណ្ឌកំរិតធ្ងន់ ដឹកនាំដោយលោក វរសេនីយ៍ទោ សាន សុភា នាយការិយាល័យព្រហ្មទណ្ឌកំរិតធ្ងន់ ក្រោមការ បញ្ជារផ្ទាល់ពីលោក ឩត្តមសេនីយ៍ បែន រ័ត្ន ស្នងការខេត្តកំពង់ចាម បានធ្វើប្រតិបត្តិការជាមួយសមត្ថកិច្ចខេត្តក្រចេះ ធ្វើការ ឃាត់ ចាប់ នៅចំណុចភូមិស្រែនន ឃុំកន្ទួត ស្រុកចិត្តបូរី ខេត្តក្រចេះ វេលាម៉ោង ១២នឹង២០នាទី ។ ពេលនេះ ត្រូវបានបញ្ជូន មកកាន់ខេត្តកំពង់ចាម ។
ជនសង្ស័យជាឃាតកដែលចាក់សាំងដុតមិត្តភ័ក្ត្រជា ត្រូវបានគេដឹងថា ឈ្មោះ ហេង ម៉ារ៉ែន មានឋានន្តរស័ក្តិថ្នាក់ វរសេនីយ៍ត្រី មានតួនាទី ជា នាយរងការិយាល័យ ផែនការគណនេយ្យ នៃស្នងការដ្ឋាននគរបាលខេត្តកំពង់ចាម ។
គួរបញ្ជាក់ថា មន្ដ្រីធនាគារជាតិខេត្ដ កំពង់ចាម លោកធុច សាថាត អាយុ ៤៩ ឆ្នាំ ជាពោះម៉ាយកូន ២ បានស្លាប់ ដោយសារតែ ភ្លើងឆេះ កាលពី វេលាម៉ោង ១១ និង ៣០ នាទីយប់ ថ្ងៃទី៩ ខែ កុម្ភៈ ឆ្នាំ២០១៤ កន្លងទៅ ។
ជនរងគ្រោះ ស្ថិតនៅផ្ទះជួល ភូមិ ទី៦ សង្កាត់វាលវង់ ក្រុងកំពង់ចាម ខេត្ដ កំពង់ចាម។នៅយប់កើតហេតុ ជនរងគ្រោះត្រូវមិត្តភក្តិ ហៅទឹកផឹកស៊ីនៅហាង ណាណា ។ ក្រោយមក ម៉ោងប្រមាណជា ១១ យប់ ក៏ត្រឡប់មកវិញ ជាមួយមិត្តភក្តិ ។ បន្ទាប់មកក៏ស្រាប់តែមានភ្លើងឆេះ ហើយមិត្តភក្តិ បាន រត់ចេញ ហើយគេចខ្លួនបាត់ ។ សមត្ថកិច្ចបានសន្និដ្ឋានថា ជាករណីប្លន់សម្លាប់ យកទ្រព្យសម្បត្តិ ៕
