កំពត ៖ ការស្តារហេដ្ឋារចនាសម្ព័ន្ធនានាត្រូវតែមានគុណភាព ដោយមន្ត្រីពាក់ព័ន្ធមិនត្រូវមានការធ្វេសប្រហែស ហើយការអនុវត្ត គម្រោងស្ថាបនានិមួយៗ ត្រូវការត្រួតពិនិត្យឲ្យបានហ្មត់ចត់ និងត្រូវសហការរួមគ្នាអនុវត្តឲ្យមានគុណភាពខ្ពស់។
ការលើកឡើងបែបនេះ ជាប្រសាសន៍របស់ ឯកឧត្តម ជាវ តាយ អភិបាល នៃគណៈអភិបាលខេត្តកំពត ថ្លែងក្នុងកិច្ចប្រជុំ គម្រោងអភិវឌ្ឍ ខេត្តកំពត ឆ្នាំ២០១៨ នៅក្នុងសាលាខេត្តកំពត នារសៀលថ្ងៃទី២៣ខែសីហា ឆ្នាំ២០១៨។
ឯកឧត្តមអភិបាលខេត្តបានបញ្ជាក់ទៀតថា ចំពោះការស្ថាបនាផ្លូវនានាក្នុងក្រុងកំពត គឺយើងត្រូវគិតគូរឲ្យបានច្បាស់លាស់ តើយើងត្រូវ អនុវត្តរបៀបណា ទើបធានាបានគុណភាពខ្ពស់។ជាមួយគ្នានេះផ្នែកជំនាញពាក់ព័ន្ធគួរសិក្សាលម្អិតពីតំបន់ភូមិសាស្ត្ររបស់ខេត្តកំពត តើត្រូវស្ថាបនាផ្លូវក្រាលកៅស៊ូ DBST ឬស្ថាបនាផ្លូវដោយប្រើបេតុងនោះ។
លោក ជាវ តាយ បានសង្កត់ធ្ងន់ទៀតថា ជាទូទៅដោយសារតំបន់ខេត្តកំពតជាតំបន់ជាប់មាត់សមុទ្រ ការស្ថាបនាផ្លូវដោយក្រាលកៅស៊ូ DBSTវាមិនអាចធានាគុណភាពបានយូរអង្វែង ដូចការប្រើបេតុងនោះទេ ការស្ថាបនាផ្លូវដោយប្រើបេតុង ទើបមានភាពរឹងមាំនិង មានគុណភាពល្អ។លោកថា ការប្រើសរសៃដែកជាមួយបេតុងអាចធានាគុណភាពផ្លូវមានភាពរឹងមាំជាងផ្លូវក្រាលកៅស៊ូ DBSTយ៉ាងពិតប្រាកដ។
យ៉ាងណាមិញ លោកអភិបាលខេត្តកំពត ក៏បានដាស់តឿនដល់មន្ទីរ អង្គភាពពាក់ព័ន្ធទាំងអស់ត្រូវសហការគ្នាឲ្យបានល្អ ដើម្បីស្តារហេដ្ឋា រចនាសម្ព័ន្ធក្នុងខេត្តកំពត ឲ្យកាន់តែមានការរីកចម្រើន និងមានគុណភាពខ្ពស់ ហើយផ្លូវសាងសង់ពីអ្វីក៏ដោយ ជាDBSTក្តី ការស្ថាបនា ជាបេតុងក៏ដោយ បើយើងមិនរួមគ្នាថែរក្សាការពារនោះទេ ពិតជាងាយឆាប់ខូចខាតជៀសមិនផុតឡើយ ។
ឯកឧត្តម ជាវ តាយ បានបញ្ជាក់ទៀតថា គម្រោងសាងសង់និមួយៗត្រូវមានបង្កើតគណៈកម្មការត្រួតពិនិត្យមើលគម្រោងនៃការស្ថាបនាហេដ្ឋារចនាសម្ព័ន្ធនានារបស់ខេត្តកំពតយើង ហើយមន្ទីរអង្គភាពពាក់ព័ន្ធទាំងអស់ត្រួវរួមគ្នាគិត រួមគ្នាធ្វើ ហើយសហការរួបរួមគ្នាជាធ្លុងមួយ ដើម្បីជាយន្តការជួយអភិវឌ្ឍខេត្តកំពតយើងកាន់មានភាពរីកចម្រើនថែមទៀត៕
