បាត់ដំបង ៖ បុរសម្នាក់កំពុងជិះលើរទេះ បានធ្លាក់លើផ្លូវ ត្រូវរថយន្តដឹកទឹកកកសេះហោះ បើកពីក្រោយក្នុងល្បឿនលឿន កិនចំក្បាល ដែលមានពាក់មួកសុវត្ថិភាព ផ្ទុះបែកខួរស្លាប់នៅកន្លែងកើតហេតុ ហើយរថយន្តបន្តទៅមុខប្រហែល ៨០ ម៉ែត្រ អ្នកបើកបរចុះគេចខ្លួនបាត់ កាលពីវេលាម៉ោង ៥ និង ៣០ នាទី ព្រឹកថ្ងៃទី២២ ខែមករា ឆ្នាំ២០១៤ លើកំណាត់ផ្លូវជាតិលេខ ៥ ស្ថិតក្នុងភូមិស្វាយធំ ឃុំអូរដំង ២ ស្រុកសង្កែខេត្តបាត់ដំបង ។
សមត្ថកិច្ច នគរបាលចរាចរណ៍ផ្លូវគោក ខេត្តដែលចុះវាស់វែង បានអោយដឹងថា បុរសរងគ្រោះស្លាប់ មានឈ្មោះ សេង សៀន អាយុ ៥៧ ឆ្នាំមានទីលំនៅភូមិកន្ទួត សង្កាត់ក្តុល ក្រុងបាត់ដំបង ។ ជនរងគ្រោះជិះរទេះ ដែលមានម៉ូតូអូសម៉ាកសាន់យ៉ាន់ មានគ្នា ៤ នាក់បើកបរ ដោយឈ្មោះ វ៉ែន ឆេត អាយុ ៣៨ ឆ្នាំ រស់នៅភូមិថ្កូវ សង្កាត់ក្តុល ។ អ្នកជិះពីក្រោយមានទី ១ ឈ្មោះ សេង សៀន ជាជនរងគ្រោះ ។ ទី២ឈ្មោះ គុជ ក្តាត់ អាយុ៦៥ឆ្នាំ រស់នៅភូមិកន្ទួតសង្កាត់ក្តុល ។ ទី៣ឈ្មោះ សិរីរតនៈ អាយុ ២៣ ឆ្នាំ រស់នៅភូមិកន្ទួតសង្កាត់ក្តុល ។
ចំណែករថយន្តម៉ាក មីតស៊ុយប៊ីស៊ីពណ៌ ស គ្មានស្លាកលេខ ចំណុះ២,៥តោន បាញ់ថ្នាំជាអក្សរ (រោងចក្រទឹកកក សេះ ហោះ B302) អ្នកបើកបរ មិនស្គាល់សាវតា ។
ឈ្មោះ វ៉ែន ឆេត ជាអ្នកបើកបរម៉ូតូសាន់យ៉ាន់ សណ្តោងរទេះ បានប្រាប់សមត្ថកិច្ចថា ពួកខ្លួនជាកម្មករ បានធ្វើដំណើរ ពីបាត់ ដំបង ឆ្ពោះទៅខេត្តពោធិ៍សាត់ ដើម្បីដឹកទូរយកមកអោយគេ តែពេលកំពុងធ្វើដំណើរតាមផ្លូវជាតិ មានរថយន្តមួយគ្រឿង បើក លឿនតាមពីក្រោយប្រកិត លុះដល់ចំណូចកើតហេតុ មានជង្ហុគ និងទួល ពេលនោះ មិនដឹងជារថយន្តបុករទេះធ្លាក់មនុស្ស ឬរទេះហើបកង់ធ្លាក់មនុស្ស ឬយ៉ាងណាទេ ទើបបណ្តាលឲ្យរថយន្តកិនជនរងគ្រោះ បែកមួកសុវត្ថភាព និងបែកក្បាល ធ្លាយខួរ ស្លាប់ ។ ពេលនោះរទេះ ក៏បានរ៉េធ្លាក់ពីផ្លូវជាតិដែរ ហើយរថយន្តបានបើកទៅមុខប្រហែលជិត ១០០ ម៉ែត្រទើបឈប់ ។ ចំពោះ អ្នកជិះលើរទេះផ្សេងទៀតមិនមានគ្រោះថ្នាក់អ្វីឡើយ។
សមត្ថកិច្ចនគរបាលចរាចរណ៍បានបញ្ជាក់ថា ករណីគ្រោះថ្នាក់ចរាចរណ៍នេះ មិនទាន់ហ៊ានដាក់កំហុសលើភាគីណាខុស ឬភាគី ណាត្រូវឡើយ ព្រោះភាគីខាងរថយន្តមិនទាន់ចូលមកបំភ្លឺនៅឡើយ ។ ទោះជាយ៉ាងណា ជាបឋមសមត្ថកិច្ច បានធ្វើតាម សំណូម ពរ សាច់ញាតិជនរងគ្រោះ ជួយដឹកសពយកទៅផ្ទះ ដើម្បីធ្វើបុណ្យតាមប្រពៃណី បន្ទាប់មកប្រមូលវត្ថុតាង ទាំងសង ខាង យកមករក្សាទុកនៅការិយាល័យ ចរាចរណ៍ផ្លូវគោក រង់ចាំការស្រាវជ្រាវ និងដោះស្រាយជាក្រោយ ។
ពាក់ព័ន្ធករណីនេះ លោក ហុក ហឿត នាយរងការិយាល័យចរាចរណ៍ផ្លូវគោក បានអោយដឹងថា រថយន្តដឹកទឹកកក យីហោ សេះហោះ ភាគច្រើនមិនមានឯកសារគ្រប់គ្រាន់ ហើយបើកលឿន ពេលបើកបុកគេម្តងណា មិនថាស្រាល ឬធ្ងន់ គឺអ្នកបើកបរ គេចខ្លួនបាត់ ៕ ភារម្យ
