ខេត្តមណ្ឌលគិរី ៖ នៅថ្ងៃទី១៥ ខែសីហា ឆ្នាំ២០១៥ ឯកឧត្ដមស្វាយ សំអ៊ាង អភិបាលនៃគណៈអភិបាលខេត្តបានចែកពូជដំណាំហូបផ្លែដល់ប្រជាកសិករ១៥៥គ្រួសារ។
លោក សុង ឃាង ប្រធានមន្ទីរកសិកម្ម រុក្ខាប្រមាញ់ និង នេសាទខេត្ត បានប្រាប់សារព័តមានខ្មែរអច្ឆរិយៈ ថាស្ថានភាពនិងអាកាសធាតុ ទឹកភ្លៀងចាប់ពីដើមឆ្នាំ២០១៧ មកទល់ពេលបច្ចុប្បន្ននេះមានភ្លៀងធ្លាក់បរិមាណសរុបជាមធ្យមចំនួន១៥៣២,៤៣ មីលីម៉ែត្រ ច្រើនជាងឆ្នាំមុន៣៨៥,៨៧មីលីម៉ែត្រ។
លោកបានបញ្ជាក់ទៀតថា នៅឆ្នាំមុនបានដាំដំណាំប័រ ចំនួន១១០ហិកតា និងធូរ៉េន ចំនួន៧២ហិចតាដោយឡែកឆ្នាំនេះ មន្ទីរបាននាំពូជដំណាំហូបផ្លែចែកជូនប្រជាកសិករ ក្នុងក្រុងសែនមនោរម្យ មាន១៥៥គ្រួសារ ដោយក្នុងមួយគ្រួសារទទួលបានពូជដំណាំហូបផ្លែចំនួន៥ដើម។
ប្រជាកសិករដែលរស់នៅក្នុងក្រុងសែនមនោរម្យ បានថ្លែងអំណរគុណយ៉ាងជ្រៀលជ្រៅចំពោះឯកឧត្តម ស្វាយ សំអ៊ាង អភិបាលខេត្តនិងលោក សុង ឃាងប្រធានមន្ទីរកសិកម្ម រុក្ខាប្រមាញ់ និងនេសាទ តែងតែយកចិត្តទុកដាក់ និងគិតគូដល់ជីវភាពរស់នៅរបស់ប្រជាខ្វះខាត ដោយបានផ្តល់ជាពូជដំណាំផ្សេងៗដល់ប្រជាកសិករសម្រាប់យកទៅធ្វើការដាំដុះ និងបង្កបង្កើនផលជារៀងរាល់ឆ្នាំ ។
ឯកឧត្ដម ស្វាយ សំអ៊ាង អភិបាលខេត្តមណ្ឌលគិរី បានផ្ដាំផ្ញើរដល់ប្រជាកសិករទាំង១៥៥ គ្រួសារត្រូវយកចិត្តទុកដាក់បង្កបង្កើនផល ដើម្បីទ្រទ្រង់ជីវភាពគ្រួសារ ជាពិសេសដំណាំហូបផ្លែដែលជាពូជល្អៗ ទទួលបានពីមន្ទីរកសិកម្មខេត្ត មិនត្រូវខ្ជះខ្ជាយធ្វេសប្រហែស នាំអោយខាតបង់ឡេីយ។
ឯកឧត្ដមសង្ឃឹមថាថ្ងៃក្រោយ ជីវភាពពលរដ្ឋនិងបានធូរធា តាមរយ:ការបង្កបង្កើនផល ហើយត្រូវថែរក្សាសុខភាពជាចំបងក្នុងការរស់នៅ ៕
