(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃសុក្រ ២រោច ខែបឋមាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៩ ខែមិថុនា ឆ្នាំ២០១៨នេះ អញ្ជើញជាអធិបតីបើកការដ្ឋានសាងសង់ស្ពានអាកាស និងផ្លូវក្រោមដីនៅរង្វង់ចោមចៅ ដែលជាស្ពានអាកាសទី៦នៅក្នុងរាជធានីភ្នំពេញ។
ស្ពានអាកាស និងផ្លូវក្រោមដីរង្វង់មូលចោមចៅ ដែលបើកការដ្ឋានសាងសង់នៅថ្ងៃនេះ សាងសង់ដោយក្រុមហ៊ុនក្រុមហ៊ុនវិនិយោគទុនអាណិកជនកម្ពុជា (OCIC) ដោយចំណាយថវិកាប្រមាណ ២២លានដុល្លារអាមេរិក ហើយគ្រោងចំណាងពេលសាងសង់ ៣០ខែ គិតចាប់ពីថ្ងៃនេះទៅ។
ស្ពានអាកាស និងផ្លូវក្រោមដីនៅរង្វង់ចោមចៅនេះ គឺជាស្ពានអាកាសទី៦ហើយនៅក្នុងរាជធានីភ្នំពេញ បន្ទាប់ពីស្ពានអាកាសរង្វង់មូលក្បាលថ្នល់ ស្ពានអាកាស៧មករា ស្ពានអាកាសរង្វង់មូលស្ទឹងមានជ័យ ស្ពានអាកាស៥មករា និងស្ពានអាកាសផ្សារដីហ៊ុយ ដែលគ្រោងសម្ពោធក្នុងនៅដើមខែកក្កដាខាងមុខនេះ។
រាជធានីភ្នំពេញក្រោយថ្ងៃរំដោះ៧ មករា ឆ្នាំ១៩៧៩ ក្រោមការតស៊ូរបស់អ្នកស្នេហាជាតិដឹកនាំដោយគណបក្សប្រជាជនកម្ពុជា មានប្រជាពលរដ្ឋមិនដល់ ១០០នាក់នោះទេ ហើយក៏មិនមានចំនួនយានយន្តផងដែរ។ រយៈពេលប្រមាណជា ៣៩ឆ្នាំក្រោយថ្ងៃរំដោះចេញពីរបបកាប់សម្លាប់ដ៏ឃោរឃៅរបស់បនប្រល័យពូជសាសន៍ ប៉ុល ពត រាជធានីភ្នំពេញ ដែលជាបេះដូងរបស់ព្រះរាជាណាចក្រកម្ពុជាទាំងផ្នែកសេដ្ឋកិច្ច ពាណិជ្ជកម្ម ទេសចរណ៍ និងវប្បធម៌ មានការវិវឌ្ឍន៍យ៉ាងឆាប់រហ័ស ហើយផ្ទៃដីរាជធានីភ្នំពេញទៀតសោត ក៏ត្រូវបានពង្រីកពីជាង ៣០០គីឡូម៉ែត្រក្រឡា រហូតដល់ទៅជាង ៦០០គីឡូម៉ែត្រក្រឡានាពេលបច្ចុប្បន្ន។
ចំនួនប្រជាពលរដ្ឋទាំងអ្នករស់នៅអាចិន្ត្រៃយ៍ និងអ្នកចូលមកប្រកបអាជីវកម្ម សិក្សារៀនសូត្រ ព្រមទាំងទេសចរណ៍ផងនោះ មិនតិចជាង ៣លាននាក់នោះឡើយ ខណៈដែលយានយន្តបានកើនឡើងរហូតដល់ជាង ២លានគ្រឿងទៅហើយ ក្នុងនោះទោចក្រយានដែលបានចុះបញ្ជីមានចំនួន ១.៥លានគ្រឿង និងរថយន្តគ្រប់ប្រភេទមានចំនួន ៦០ម៉ឺនគ្រឿង។
ការកើនឡើងដ៏ឆាប់រហ័សនៃចំនួនប្រជាពលរដ្ឋ និងយានយន្តជាហេតុធ្វើឲ្យការធ្វើចរាចរណ៍ក្នុងរាជធានីភ្នំពេញកាន់តែចង្អៀត និងមានការ កក់ស្ទះចរាចរណ៍ជាខ្លាំង ជាពិសេសនៅតាមរង្វង់មូលមានចំណុចប្រសព្វផ្លូវច្រើនខ្សែនោះ។ រង្វង់មូលចោមចៅ ជាកន្លែងដែលមានប្រសព្វផ្លូវច្រើនខ្សែ រួមមានមហាវិថីសហព័ន្ធរុស្ស៊ី ផ្លូវជាតិលេខ៤ ផ្លូវជាតិលេខ៣ និងផ្លូវវេងស្រេងផងដែរ ជាហេតុនាំឲ្យមានការកកស្ទះចរាចរណ៍ យ៉ាងខ្លាំងនាពេលបច្ចុប្បន្ន។
ការសាងសង់ស្ពានអាកាស និងផ្លូវក្រោមដីនៅរង្វង់មូលចោមចៅ គឺជាការយកចិត្តទុកដាក់មួយរបស់រាជរដ្ឋាភិបាលក្នុងការដោះស្រាយបញ្ហារបស់ប្រជាពលរដ្ឋក្នុងរាជធានីភ្នំពេញ ដែលត្រូវចំណាយពេលយ៉ាងច្រើនដោយការកកស្ទះចរាចរណ៍នេះ។ វត្តមានស្ពានអាកាស និងផ្លូវក្រោមដីនៅរង្វង់មូលចោមចៅ ត្រូវបានរំពឹងថា នឹងជួយដោះស្រាយបញ្ហាទាំងអស់នេះ បន្ទាប់ពីបញ្ចប់ការសាងសង់ជាស្ថាពរ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានថ្លែងថា ស្ពានអាកាសចោមចៅនេះពិតជាមានសារសំខាន់ណាស់ ក្នុងការដោះស្រាយបញ្ហាកកស្ទះចរាចរណ៍ដែលកើតមានជាអន្លើៗ នាពេលកន្លងមក ក៏ដូចជានាពេលបច្ចុប្បន្ន ដោយសារផ្លូវនេះជាផ្លូវសេដ្ឋកិច្ចដ៏សំខាន់ សម្រាប់ការដឹកជញ្ជូនឆ្ពោះទៅផ្លូវជាតិលេខ៣ និងផ្លូវជាតិលេខ៤ ដែលជាខេត្តមានកំពង់ផែសមុទ្រទឹកជ្រៅនៅកម្ពុជា ក្នុងការផ្លាស់ប្តូរទំនិញចេញចូលក្នុង និងក្រៅប្រទេស។
លោកបញ្ជាក់ថា ស្ពាន និងផ្លូវក្រោមដី ត្រង់ចំណុចរង្វង់មូលចោមចៅនេះ ក៏ជាផ្លូវសេដ្ឋកិច្ចដ៏សំខាន់ផងដែរ ព្រោះជាបណ្តាញដឹកជញ្ជូនទំនិញសំខាន់ជាងគេ ដែលអាចឲ្យវិនិយោគិន អាជីវករ និងប្រជាពលរដ្ឋទូទៅទទួលផលចំណេញ ចំពោះសេដ្ឋកិច្ចផ្ទាល់ខ្លួនរបស់ពួកគេ មិនត្រឹមតែចំណេញពេលវេលានោះទេ ថែមទាំងចំណេញថវិកាក្នុងការចំណាយរបស់ប្រជាពលរដ្ឋផងដែរ។
ខាងក្រោមជាព័ត៌មានពាក់ព័ន្ធនឹងគម្រោងសាងសង់ស្ពានអាកាស និងផ្លូវក្រោមដីរង្វង់មូលចោមចៅ៖
ស្ពានទី១៖ ជាស្ពានអាកាសមេ តភ្ជាប់ចរាចរពីមហាវិថីសហព័ន្ធរុស្ស៊ី មកផ្លូវជាតិលេខ៣ មានប្រវែង ៤០៨ម៉ែត្រ ទទឹង ១៥.៨ម៉ែត្រ ដែលមានចរាចរពីរគន្លងទៅ និងពីរគន្លងមក ជម្រាលស្ពាន ៤.៥ម៉ែត្រ និងមានកម្ពស់អតិបរិមាដែលអាចចរាចរក្រោមស្ពានបាន ៥.៥ម៉ែត្រ។
ស្ពានទី២៖ បំបែកចេញពីស្ពានអាកាសមេ បត់ឆ្វេងតភ្ជាប់ចរចាពីមហាវិថីសហព័ន្ធរុស្ស៊ីឆ្ពោះទៅផ្លូវវេងស្រេង សម្រាប់ចរាចរមួយទិស ដែលមានមួយគន្លងរថយន្ត និងមួយគន្លងទោចក្រយានយន្ត មានប្រវែងសរុប ២០២ម៉ែត្រ (ស្ពានអាកាសប្រវែង ៤០ម៉ែត្រ ផ្លូវក្រោមដីប្រវែង ១១៨ម៉ែត្រ និងផ្លូវលើដីប្រវែង ៤៤ម៉ែត្រ) ទទឹង ៥.២៥ម៉ែត្រ។
ស្ពានទី៣៖ ជាស្ពានកោងបត់ឆ្វេងតភ្ជាប់ចរាចរពីផ្លូវវេងស្រេងមកផ្លូវជាតិលេខ៣ មានប្រវែងសរុប ២០៦ម៉ែត្រ (ស្ពានអាកាសប្រវែង ៦០ម៉ែត្រ ផ្លូវក្រោមដី ប្រវែង ១១៨ម៉ែត្រ និងផ្លូវលើដីប្រវែង ២៨ម៉ែត្រ ទទឹង ៥.២៥ម៉ែត្រ សម្រាប់ចរាចរមួយទិស ដែលមានមួយគន្លងរថយន្ត និងមួយគន្លងទោចក្រយានយន្ត)។
ផ្លូវកោង និងផ្លូវក្រោមដី៖ ជាផ្លូវកោង តភ្ជាប់ចរាចរពីផ្លូវវេងស្រេង មកផ្លូវជាតិលេខ៤ មានប្រវែងសរុប ១៣០ម៉ែត្រ (ផ្លូវក្រោមដីប្រវែង ១៣ម៉ែត្រ និងផ្លូវលើដីប្រវែង ១១៧ម៉ែត្រ) ទទឹង ៨.៥ម៉ែត្រ សម្រាប់ចរាចរមួយទិស ដែលមានពីរគន្លងរថយន្ត និងមួយគន្លងទោចក្រយានយន្ត។
ផ្លូវលើផ្ទៃដី៖ ជាផ្លូវតភ្ជាប់ចរាចរពីផ្លូវជាតិលេខ៤ មកមហាវិថីសហព័ន្ធរុស្ស៊ី ដែលមានប្រវែងសរុប ៤៧០ម៉ែត្រ ទទឹង ៨.៥ម៉ែត្រ សម្រាប់ចរាចរមួយទិស ដែលមានពីរគន្លងរថយន្ត និងមួយគន្លងទោចក្រយានយន្ត៕
