(មណ្ឌលគិរី)៖ ឧត្តមសេនីយ៍ត្រី សូ សុវណ្ណ ស្នងការរងទទួលផែនព្រហ្មទណ្ឌ ខេត្តមណ្ឌលគិរី បានថ្លែងប្រាប់ឲ្យដឹង នៅព្រឹកថ្ងៃទី០២ គុម្ភៈថា ជនដៃដល់ ឈ្មោះ ផល ពេញ គឺជានាយនគរបាលប៉ុស្តិ៍អូរលែ ដែល ជាអ្នកសម្លាប់មន្ត្រីកងរាជអាវុធហត្ថ មន្ត្រីបរិស្ថាន និងអង្គរក្ស ៣នាក់នោះ នៅព្រឹកនេះ ត្រូវបានចាប់ខ្លួនហើយ នៅក្នុងស្រុកមេមត់ ខេត្តត្បូងឃ្មុំ ខណៈជនដៃដល់រូបនេះបម្រុងរត់គេចខ្លួនទៅស្រុកកំណើត នៅខេត្តព្រៃវែង។
លោកឧត្តមសេនីយ៍ទោ បែន រ័ត្ន ស្នងការនគរបាលខេត្តត្បូងឃ្មុំ បញ្ជាក់ថា ជនដៃដល់រូបនេះត្រូវបានកម្លាំងនគរបាលស្រុកមេមត់របស់លោក សហការជាមួយនគរបាលខេត្តមណ្ឌលគិរី ចាប់ខ្លួននៅពេលនៅពេលជនដៃដល់កំពុងចូលហូបគុយទាវ នៅហាងឥន្ទ្រី។
ឈ្មោះ ផល ពេញ នាយនគរបាលប៉ុស្តិ៍អូររលែ ជនដៃដល់បាញ់សម្លាប់មន្ត្រីអាវុធហត្ថលើផ្ទៃប្រទេស,មន្ត្រីឧទ្យានុរក្ស នៃមន្ទីរបរិស្ថាន ខេត្តមណ្ឌលគិរី និងបុគ្គលិកអង្កការ WCS ត្រូវបានកម្លាំងសមត្ថកិច្ចចាប់ខ្លួនបានហើយ នៅព្រឹកថ្ងៃទី០២ ខែកុម្ភៈ ឆ្នាំ២០១៨នេះ។
គិតត្រឹមយប់មិញ មន្ត្រីយោធាការពារព្រំដែន៣នាក់ និង មន្ត្រីនគរបាលការពារព្រំដែនម្នាក់ ត្រូវបានចាប់ខ្លួនជាបន្តបន្ទាប់ ពាក់ព័ន្ធការបាញ់សម្លាប់មនុស្ស៣នាក់ នៅស្រុកអូររាំង ខេត្តមណ្ឌលគិរី ខណៈជនដៃដល់ជា នាយនគរបាលប៉ុស្តិ៍អូររលែ ឈ្មោះ ផល ពេញ បាននិងកំពុងរត់គេចខ្លួននៅក្នុងព្រៃនៅឡើយ។
សូមរលឹកវិញថា ការបាញ់ប្រហារនេះគឺកើតឡើងនៅចំណុចប៉ុស្ដិ៍អូររលែ ក្នុងភូមិសាស្ដ្រភូមិពូហ្យាមឃុំសែនមនោរម្យ ស្រុកអូររាំង ខេត្តមណ្ឌលគិរី នៅចន្លោះម៉ោង៤ ទៅម៉ោង៥ល្ងាចថ្ងៃទី៣០ ខែមករាឆ្នាំ២០១៨ បានបណ្ដាលឲ្យស្លាប់មនុស្ស៣នាក់ ក្នុងនោះមាន មន្ដ្រីអាវុធហត្ថលើផ្ទៃប្រទេសឈ្មោះសេក វឌ្ឍនា, មន្ដ្រីឧទ្យានុរក្ស នៃមន្ទីរបរិស្ថានខេត្តមណ្ឌលគិរី ឈ្មោះ តើន សុខណៃ និងបុគ្គលិកអង្គការសមាគមអភិរក្សាសត្វព្រៃ Wildlife Conservation Society (WCS)ឈ្មោះ ថុល ខ្នា ដែលការបាញ់ប្រហារនេះផ្តើមចេញពីបទល្មើសព្រៃឈើ តែម្តង ៕
