ខេត្តមណ្ឌលគិរី : ប្រភពពីប្រជាពលរដ្ឋរស់នៅជិតច្រកណាំលៀ ស្រុកពេជ្រាដា បានឲ្យដឹងថាក្នុងមួយយប់ៗលោក សំរិត ណយ បើកដៃឲ្យឈ្មួញដឹកជញ្ជូនឈើចេញតាមច្រកនេះមិនតិចជាង២០រថយន្តឡង់គ្រឺស័រកែច្នៃនោះទេ ហើយជួនកាលឈ្មួញដឹកជញ្ជូនឈើចេញទាំងថ្ងៃទៀតផង។ ប្រភពខ្លះបានឲ្យដឹងថា លោក អ៊ុក សំណាង ស្នងការនគរបាលខេត្តមណ្ឌលគិរី ដែលទើបចូលកាន់តំណែងជំនួសលោក តូច យ៉ុន ជាអ្នកឃុបឃិតឲ្យលោក សំរិត ណយ ធ្វើអ្វីៗតាមអំពើចិត្តដើម្បីជាថ្នូរនឹងផលប្រយោជន៍។ ទន្ទឹមនឹងនេះលោក ស្វាយ សំអ៊ាង អភិបាលខេត្តមណ្ឌលគិរី និងជាគណៈបញ្ជាការឯកភាពខេត្តមណ្ឌលគិរី ក៏ជាប់ពាក់ព័ន្ធនឹងផលប្រយោជន៍ដែរទើបបណ្ដោយឲ្យលោក សំរិត ណយ មេប៉ុស្ដិ៍ច្រកណាំលៀ ឬប៉ុស្ដិ៍៧បើកដៃឲ្យឈ្មួញដឹកជញ្ជូនឈើចេញទៅស្រុកយួនដោយគ្មានញញើតអ្វីទាំងអស់។ អាចនិយាយបានថា ដោយសារលោក សំរិត ណយ មានខ្នងបង្អែករឹងមាំទើបហ៊ានបើកដៃឲ្យឈ្មួញដឹកជញ្ជូនឈើទៅស្រុកយួនយ៉ាងគគ្រឹកគគ្រេង។
មន្ត្រីនគរបាលនៅក្នុងស្នងការដ្ឋាននគរបាលខេត្តមណ្ឌលគិរី បានបង្ហើបឲ្យដឹងថា បើគ្មានការឃុបឃិតបើកដៃពីសំណាក់លោក អ៊ុក សំណាង ស្នងការនគរបាលខេត្តមណ្ឌលគិរី ទេនោះគឺលោក សំរិត ណយ មេប៉ុស្ដិ៍ច្រកណាំលៀ មិនហ៊ានធ្វើអ្វីៗតាមអំពើចិត្តរបស់ខ្លួននោះទេ។ ទាល់តែមានការឃុបឃិតពីលោក អ៊ុក សំណាង ស្នងការនគរបាលខេត្តមណ្ឌលគិរី លោក ស្វាយ សំអ៊ាង អភិបាលខេត្តមណ្ឌលគិរី និងសមត្ថកិច្ចអាវុធហត្ថខេត្តមណ្ឌលគិរី ក៏ដូចជាមន្ត្រីអាវុធហត្ថលើផ្ទៃប្រទេសមួយចំនួនទើបលោក សំរិត ណយ ហ៊ានបើកដៃឲ្យឈ្មួញដឹកជញ្ជូនឈើទៅស្រុកយួនកាន់តែច្រើនឡើងៗ។ ប្រការនេះលោក នេត សាវឿន អគ្គស្នងការនគរបាលជាតិ គួរពិនិត្យឡើងវិញផងដែរ ក្នុងខណៈដែលមន្ត្រីនគរបាលក្នុងខេត្តមណ្ឌលគិរី កំពុងឃុបឃិតបើកដៃឲ្យឈ្មួញដឹកជញ្ជូនឈើចេញទៅស្រុកយួនយ៉ាងពេញបន្ទុកជារៀងរល់ថ្ងៃ។
ប្រភពពីមន្ត្រីនៅច្រកណាំលៀ ស្រុកពេជ្រាដា ខេត្តមណ្ឌលគិរី បានឲ្យដឹងថាមួយរយៈកន្លងទៅនេះលោក សំរិត ណយ មេប៉ុស្ដិ៍ច្រកណាំលៀ ឬប៉ុស្ដិ៍៧ បានឃុបឃិតឲ្យឈ្មួញដឹកជញ្ជូនឈើប្រណីតចេញទៅស្រុកយួនយ៉ាងពេញបន្ទុកដោយគ្មានមន្ត្រីជំនាញ ឬសមត្ថកិច្ចពាក់ព័ន្ធណាចាត់វិធានការទប់ស្កាត់ឡើយ។ ប្រភពបានឲ្យដឹងទៀតថា ឈ្មួញមួយចំនួនបានដឹកឈើតាមរថយន្តឡង់គ្រឺស័រកែច្នៃ យកទៅស្តុកទុកទល់មុខចំការកៅស៊ូបារាំង-ប៊ូស្រា ស្រុកពេជ្រាដា ហើយនៅពេលយប់ទើបពួកគេដឹកជញ្ជូនទៅស្រុកយួនតាមច្រកណាំលៀ យ៉ាងរលូនតែម្តង។
មន្ត្រីនៅច្រកណាំលៀ ឬប៉ុស្ដិ៍៧បានបង្ហើបឲ្យដឹងថា មន្ត្រីអាវុធហត្ថក្នុងខេត្តមណ្ឌលគិរី និងមន្ត្រីអាវុធហត្ថលើផ្ទៃប្រទេសមួយចំនួនដែលមានតួនាទីក្នុងការបង្ក្រាបបទល្មើសព្រៃឈើ ក៏អាចជាប់ពាក់ព័ន្ធទទួលផលប្រយោជន៍ពីលោក សំរិត ណយ ជាប្រចាំទើបមិនបង្ក្រាបបទល្មើស។ ជាក់ស្ដែងរយៈពេលប្រមាណជាង១សប្ដាហ៍កន្លងទៅនេះឈ្មួញសម្រុកដឹកឈើប្រណីតតាមរថយន្តឡង់គ្រឺស័រកែច្នៃចេញទៅស្រុកយួន តាមច្រកណាំលៀ ស្ទើតែរាល់យប់ហើយមិនឃើញមន្ត្រីជំនាញ ឬសមត្ថកិច្ចពាក់ព័ន្ធណាចាត់វិធានការបង្ក្រាបនោះទេ។ បើទោះបីឈ្មួញដឹកជញ្ជូនឈើចេញទៅស្រុកយួនទាំងកណ្ដាលថ្ងៃ ក៏គ្មានមន្ត្រីជំនាញ ឬសមត្ថកិច្ចពាក់ព័ន្ធណាចាត់វិធានការបង្ក្រាបតាមតួនាទីរបស់ខ្លួនឡើយ។
ទាក់ទងព័ត៌មានខាងលើ សារព័ត៏មានយើងមិនអាចសុំការបកស្រាយពីលោក សំរិត ណយ និងអ្នកពាក់ពន្ធ័មួយចំនួនទៀតបានទេ នៅ ពេលនេះសារព័ត៌មាននិងព្យាយាមទាក់ទងបន្តទៀត ៕
