ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសជាផ្លូវការ ដោយទុកពេលឲ្យ ៦ថ្ងៃទៀត សម្រាប់នាយករដ្ឋមន្ត្រីឡាវ ក្នុងការដកកងទ័ពឲ្យអស់ចេញពី ដែនដីកម្ពុជា។ ការកំណត់ឱសានវាទ ឲ្យឡាវដកទ័ព ត្រឹមថ្ងៃទី១៧ ខែសីហានេះ បន្ទាប់ពីសំបុត្ររបស់ សម្តេចដាក់ទៅ នាយករដ្ឋមន្ត្រីឡាវ លោក ថងលូន ស៊ីស៊ូលីត រឿងដកទ័ពនេះមិនមានការឆ្លើយតបវិញ។
ការប្រកាសរបស់ប្រមុខ រាជរដ្ឋាភិបាលកម្ពុជា នាពេលនេះ ធ្វើឡើងនៅក្នុងពិធីប្រកាស ចូលកាន់តំណែង ជាប្រធានរាជបណ្ឌិត្យសភាកម្ពុជា និងប្រកាសសមាសភាព ក្រុមបណ្ឌិត សភាចារ្យ, នៅវិមានសន្តិភាព នាព្រឹកថ្ងៃទី១១ ខែសីហា ឆ្នាំ២០១៧នេះ។
សម្ដេចតេជោ បានបញ្ជាដល់សម្ដេចពិជ័យសេនា ទៀ បាញ់ នាយឧត្ដមេសនីយ៍ ប៉ុល សារឿន និងនាយឧត្ដសេនីយ៍ គន់ គីម ជាអ្នកទទួលខុសត្រូវ ក្នុងការដឹកនាំកងទ័ព ទៅកាន់ព្រំដែនឡាវ ត្រៀមកំលាំងជាស្រេច ចាំទទួលបទបញ្ជា ពីនាយករដ្ឋមន្ត្រី រឿងវាយ ឬមិនវាយឡាវ។
ទន្ទឹមនឹងការប្រកាស ដាក់ឱសានវាទ ឲ្យឡាវដកទ័ពនេះ សម្តេចតេជោ ហ៊ុន សែន ក៏គ្រោងនឹងជិះយន្តហោះ ទៅកាន់ប្រទេសឡាវ ដើម្បីពិភាក្សារឿងដកទ័ពនេះ ផងដែរ។ សម្តេចតេជោ ហ៊ុន សែន ក៏បានបញ្ជាមេទ័ពកម្ពុជា ឲ្យត្រៀមកម្លាំង ទៅបណ្តេញកងទ័ពឡាវ ចេញពីប្រទេសកម្ពុជាផងដែរ។ ក្នុងនោះ សម្តេចតេជោ ក៏បានអំពាវនាវដល់ ប្រជាពលរដ្ឋខ្មែរ កុំឲ្យមានការភ្ញាក់ផ្អើល ប្រសិនបើឃើញ មានការចល័តទ័ព ព្រោះទ័ពទាំងនោះ ត្រូវចល័តទៅកាន់ ខេត្តស្ទឹងត្រែង ដើម្បីបណ្តេញទ័ពឈ្លានពាន របស់ឡាវចេញពីដីកម្ពុជា។
សម្តេចតេជោ ហ៊ុន សែន បានថ្លែងទៅកាន់ភាគីឡាវថា មិត្តភក្តិជារឿងមិត្តភក្តិ តែមិនអាចឲ្យមិត្តភក្តិ មកជាន់ក្បាល ខ្មែរនោះទេ។ សម្តេចតេជោ ហ៊ុន សែន បានបញ្ជាក់ថា សម្តេចបានចាត់ចែង មេទ័ពខ្មែររួចអស់ហើយ ឲ្យត្រៀមលក្ខណៈសម្បត្តិ បណ្តេញទ័ពឡាវ ចេញពីដីខ្មែរ។
សម្តេចតេជោសែនប្រមុខរាជរដ្ឋាភិបាល បានបញ្ជាក់ថា មិនចង់ប្រកាសសង្គ្រាម ជាមួយប្រទេសជិត ខាងនោះទេ តែក៏មិនអនុញ្ញាត ឲ្យប្រទេសជិត ខាងរំលោភ ដែនអធិបតេយ្យរបស់កម្ពុជា នោះឡើយ សូម្បីដីមួយចំអាម។
នៅព្រឹកថ្ងៃទី១១ ខែសីហា ឆ្នាំ២០១៧ នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានផ្ញើលិខិតជូនលោក ថោងលន់ ស៊ីសូលីត នាយករដ្ឋមន្ត្រីឡាវ ដោយស្នើឲ្យដកកងទ័ព ចេញពីទឹកដីកម្ពុជា ។
នៅក្នុងតេជោសែនលិខិតចំនួន៣ ទំព័ររបស់សម្តេចតេជោ ហ៊ុន សែន ផ្ញើជូនលោក ថោងលន់ ស៊ីសូលីត កាលពីថ្ងៃទី២ ខែសីហា ឆ្នាំ២០១៧ បានសរសេរ នៅក្នុងកម្មវត្ថុថា៖ សំណើស្នើ ឲ្យរដ្ឋាភិបាល នៃប្រទេសឡាវ ដកកងកម្លាំងប្រដាប់អាវុធ ចេញពីតំបន់ក្បែរ អូរអាឡៃ និងតំបន់អូរតាង៉ាវ ព្រំដែនខេត្តស្ទឹងត្រែង និងខេត្តអាតាពើ ឡាវ៕
