បាត់ដំបង ៖ ឈ្មោះ ផៃ ឈ្មោះ ហៀង និងឈ្មោះ គឹម យឿង ជាមន្ត្រីសហគមន៍ព្រៃចាស់ បានទទួលប្រាក់សំណូក បើក ដៃអោយឈ្មួញ ប្រព្រឹត្តល្មើសនេសាទតាមចិត្ត ដាក់ណបរ៉ាវតាមដងអូរព្រែក នៅដើមខែមករា ឆ្នាំ២០១៤ ចំណុច ឡូតិ៍ នេសាទ ១២ ក្នុងភូមិព្រៃចាស់ ឃុំព្រៃចាស់ ស្រុកឯកភ្នំ ខេត្តបាត់ដំបង ជាប់ព្រំប្រទល់ខេត្តបន្ទាយមានជ័យ ។
តាមប្រភពពីប្រជាពលរដ្ឋនេសាទ ដោយដៃ កាលពីរសៀលថ្ងៃទី ៨ ខែមករា ឆ្នាំ២០១៤ បានអោយដឹងថា ការដាក់ ណបរ៉ាវ តាមដងអូរព្រែកជាច្រើនកន្លែង បណ្តាលអោយត្រីរាំងស្ទះ មិនអាចចរាចរណ៍ឡើងចុះបាន ហើយអ្នកប្រព្រឹត្តល្មើសធ្វើសកម្មភាពយកផល តែឯង ចំណែកប្រជានេសាទដោយដៃ មិនបានទទួលត្រីសំរាប់ហូបឡើយ ។
អ្នកល្មើសនេសាទ ទាំងនេះ មានឈ្មោះ រ៉ាត់ ដាក់ នៅអូរយីបឈ្មោះ យូ ហ៊ត ដាក់នៅអូរឯកឈ្មោះ ស្រី ដាក់ នៅអូរឡឹង ឈ្មោះ ម៉ៅឡី និងកូន ដាក់នៅអូរធាក់ ហើយដែលអូរព្រែកទាំងនេះឋិតក្នុងដែនឡូតិ៍នេសាទ ១២ ក្រោមការគ្រប់គ្រងរបស់សហគមន៍ព្រៃចាស់ឈ្មោះ ផៃ ឈ្មោះ ហៀង និងឈ្មោះ គឹម យឿង ជាមន្ត្រីសហគមន៍ ។
តាមប្រភពពីប្រជាពលរដ្ឋបានបញ្ជាក់ថា ពួកខ្លួនបានស្តាប់ឮការពិភាក្សា និងខ្វែងគំនិតគ្នា រវាងឈ្មោះ ផៃ ឈ្មោះ ហៀង និងឈ្មោះ គឹម យឿង ជាមន្ត្រីសហគមន៍យកប្រាក់ពីពួកល្មើសនេសាទខុសច្បាប់ នៅចំណុចកើតហេតុខាងលើ ។
ក្នុងករណីនេះ អ្នកយកព័ត៌មានមិនអាចទំនាក់ទំនងសុំការបំភ្លឺពីឈ្មោះ ផៃ ឈ្មោះ ហៀង និងឈ្មោះ គឹម យឿង ជាមន្ត្រីសហគមន៍ព្រៃចាស់បានទេ ។
ពាក់ព័ន្ធករណីនេះ លោក នឹម សោម នាយ សង្កាត់ជលផលបាក់ព្រា មិនលើកទូរស័ព្ទ ៕
