មណ្ឌលគីរី ៖ យុទ្ធនាការទាំង ៥ រួមមាន យុទ្ធនាការព្រៃឈើធនធានធម្មជាតិ គ្រឿងញៀន បទល្មើសនេសាទ ចរាចរណ៍ ល្បែងស៊ីសង ឥឡូវត្រូវបានអគ្គស្នងការនគរបាលជាតិបានបន្ថែមចំនួន០២ទៀត គឺទី១បទឧក្រឹដ្ឋក៏ចេញជាយុទ្ធនាការផងដែរ រាល់ឧក្រឹដ្ឋជនទាំងអស់ត្រូវបានគ្រប់គ្រង តាំងពីជាប់ពន្ធនាគារចេញពីពន្ធនាគារ និយាយរួមគ្រប់វិធានការ ដើម្បីកាត់បន្ថយបទល្មើសឧក្រឹដ្ឋកម្ម ទី២គឺលុបបំបាត់ប៉ុស្តិ៍អនាធិបតេយ្យនេះជាបញ្ហាដែលរាំរ៉ៃយូរហើយដែរ ។ ដូច្នេះស្ថាប័នកងឯកភាពត្រូវចូលរួមក្នុងយុទ្ធនាការនេះ បើសិនយុទ្ធនាការទាំង៧នេះដើរព្រមគ្នា គឺប្រទេសជាតិយើងមានសេចក្តីសុខល្អ ។
នេះបើតាមប្រសាសន៍របស់ ឯកឧត្តម នាយឧត្តមសេនីយ៍ ដាំ វុទ្ធី អគ្គស្នងការរង នៃអគ្គស្នងការនគរបាលជាតិ នៅរសៀលថ្ងៃទី០៧ ខែមេសា ឆ្នាំ២០១៧ម្សិលមិញនេះ នៅសាលប្រជុំស្នងការដ្ឋាននគរបាលខេត្តមណ្ឌលគីរី ក្នុងពិធីបិទកិច្ចប្រជុំបូកសរុបលទ្ធផលការងារត្រីមាសទី១ និងផ្សព្វផ្សាយទិសដៅឆ្នាំ២០១៧ របស់ក្រសួងមហាផ្ទៃ និងអគ្គស្នងការដ្ឋាននគរបាលជាតិ ស្នងការដ្ឋាននគរបាលខេត្តមណ្ឌលគិរី។
ឯកឧត្តមបានមានប្រសាសន៍បន្តថា ដើម្បីអនុវត្តយុទ្ធនាការទាំង៧នេះ សូមស្នងការ នគរបាលខេត្តមណ្ឌលគិរីត្រូវប្រជុំត្រួតពិនិត្យផ្ទៀងផ្ទាត់គ្រប់ប្រចាំខែ ដកពិសោធន៏នូវចំនុចខ្លាំងចំនុចខ្សោយ ជាពិសេស កងកម្លាំងទាំងអស់ត្រូវដកខ្លួនអោយឆ្ងាយពាក់ព័ន្ធទៅនឹងបទល្មើស មិនធ្វើខ្នងបង្អែក និងខ្លួនឯងផ្ទាល់មិនប្រព្រឹត្តបទល្មើស នេះគឺជាបញ្ហាសំខាន់ដែលថ្នាក់ដឹកនាំ អគ្គស្នងការនគរបាលជាតិបានកំណត់ ។
ឯកឧត្តមបានបន្តថា ការងារចំពោះមុខកងកម្លាំងនគរបាល ត្រូវធ្វើសេនាធិការជូនគណៈបញ្ជាការឯកភាពខេត្ត ដើម្បីធ្វើផែនការ ការពារការបោះឆ្នោតជ្រើសរើសក្រុមប្រឹក្សាអាណត្តិទី៤ ដោយការពារជាក់ស្តែងធានាបាននូវសុវត្ថិភាពនៅតាមការិយាល័យបោះឆ្នោតនីមួយៗ។
មិនតែប៉ុណ្ណោះ កម្លាំងនគរបាលត្រូវប្រមូលផ្តុំកម្លាំងការពារសន្តិសុខសណ្តាប់ជូនប្រជាពលរដ្ឋ ភ្ញៀវជាតិ និងអន្តរជាតិ ដោយពង្រាយកម្លាំងនៅតាមវត្តអារាម រម្មណីយដ្ឋាន និងទីកន្លែងកំសាន្តផ្សេងៗក្នុងពិធីបុណ្យចូលឆ្នាំប្រពៃណីជាតិខ្មែរខាងមុខនេះ។
នៅក្នុងកិច្ចប្រជុំនោះដែរលោក ឧត្តមសេនីយ៍ត្រី តូច យ៉ុន ស្នងការនគរបាលខេត្តមណ្ឌលគិរី បានលើឡើងអំពីផែនការ និងយុទ្ធសាស្ត្រសម្រាប់អនុវត្តនៅក្នុងឆ្នាំ២០១៧ គឺជម្រុញការស្រាវជ្រាវចំពោះអង្គការជាតិ អន្តរជាតិ អង្គការសង្គមស៊ីវិល សហជីប សហគមន៍នានា សំដៅបង្កលក្ខណៈលើទឹកចិត្តក្នុងការចូលរួមអភិវឌ្ឃន៍សង្គម បន្តជម្រុញអនុវត្តន៍គោលនយោបាយភូមិឃុំមានសុវត្ថិភាពអោយមាននិរន្តរភាព និងមានប្រសិទ្ធិភាព រៀបចំកម្លាំងហ្វឹកហាត់អន្តគមន៍ពិសេសដើម្បីជាកម្លាំងស្នូលក្នុងការទប់ស្កាត់បាតុកម្ម និងកូដកម្ម បន្តធ្វើសេនាធិការជូនគណៈកម្មាធិការជាតិត្រួតពិនិត្យគ្រឿងញៀន បំផុសចលនាវិស័យឯកជន អោយមានការចូលរួមពន្លត់អគ្គីភ័យ ធ្វើសេនាធិការគណៈបញ្ជាការឯកភាពខេត្ត ចូលរួមយ៉ាងសកម្ម ក្នុងចលនាកំណែកម្រង់កងកម្លាំងនគរបាលជាតិ យកចិត្តទុកដាក់បង្កើនវិធានការប្រមែប្រមូលព័ត៌មានពាក់ព័ន្ធសន្តិសុខ និងឧបាយកល ដែលប៉ះពាល់ដល់សន្តិសុខក្នុងខេត្តមណ្ឌលគិរី ត្រួតពិនិត្យឡើងវិញគោលដៅ និងមុខសញ្ញា ដែលកំពុងមានសកម្មភាព ក្នុងមូលដ្ឋានជាពិសេសល្បែងស៊ីសង លុបបំបាត់អោយបានបាតុភាពអសកម្ម ក្នុងជួរកងកម្លាំងអនុវត្តន៍ច្បាប់ ដែលមានភារកិច្ចបង្កាទប់ស្កាត់ និងបង្ក្រាបបទល្មើសគ្រឿងញៀន ពង្រឹងសមត្ថភាព ឆន្ទៈ គុណធម៌ វិជ្ជាជីវៈក្នុងការទទួលខុសត្រូវ បង្កើនការសំដៅគុណភាពស្មោះត្រង់ចំពោះវិជ្ជាជីវៈ។
សូមបញ្ជាក់ផងដែរថា នៅក្នុងកិច្ចប្រជុំនោះដែរមន្ត្រីនគរបាលចំនួន១៨រូបត្រូវបានទទួលប័ណ្ណសរសើរ ៕
